ЖЧ-2018 ўйинлари бўлиб ўтадиган «Самара-Арена» стадионида ишлаган Ўзбекистон фуқароси катта баландликдан қулагани туфайли вафот этди. Қурилиш пудратчисининг маълум қилишича, йигит қурилишда эмас, балки ётоқхонада йиқилиб тушган.

Семашко номидаги касалхона шифокорлари бир ҳафтадан ортиқ вақт давомида 25 ёшли ўзбекистонликнинг ҳаёти учун курашишди. У 12 март куни «Самара-Арена» стадионидан бош ва қовурғалар жароҳати билан олиб келинган. Ўзбекистон фуқароси 20 март куни ҳаётдан кўз юмди. Бу ҳақда «Комсомольская Правда-Самара» ўз манбасига асосан хабар бермоқда.

Жароҳатлар эркак катта баландликдан қулаганидан дарак беради. Бироқ, у айнан қаерда, қайси баландликдан қулагани аниқланмади, деб хабар берган нашр.

Стадион қурилиши пудратчиси «Қозон» компаниясининг билдиришича, ишчи стадионда эмас, балки ётоқхонада жароҳат олган. Айнан қаерда эканига ойдинлик киритилмади.

«Ҳақиқатдан ҳам, бу ёш йигит стадион қурилишида ишларди. Бироқ 12 мартда унда дам олиш куни эди. У стадионда эмас, балки ётоқхонада йиқилган ва касалхонага олиб кетилган. Афсуски, жабрланувчи кеча вафот этди. Унинг оиласига ёрдам кўрсатилади», - дея айтиб ўтишган «Қозон» компаниясидан нашрга.

Айни дамда ушбу ҳолат бўйича текширув ўтказилмоқда, суд-тиббий тадқиқот тайинланди, у воқеага ойдинлик киритиши керак.