JCH-2018 o‘yinlari bo‘lib o‘tadigan «Samara-Arena» stadionida ishlagan O‘zbekiston fuqarosi katta balandlikdan qulagani tufayli vafot etdi. Qurilish pudratchisining ma’lum qilishicha, yigit qurilishda emas, balki yotoqxonada yiqilib tushgan.
Semashko nomidagi kasalxona shifokorlari bir haftadan ortiq vaqt davomida 25 yoshli o‘zbekistonlikning hayoti uchun kurashishdi. U 12 mart kuni «Samara-Arena» stadionidan bosh va qovurg‘alar jarohati bilan olib kelingan. O‘zbekiston fuqarosi 20 mart kuni hayotdan ko‘z yumdi. Bu haqda «Komsomolskaya Pravda-Samara» o‘z manbasiga asosan xabar bermoqda.
Jarohatlar erkak katta balandlikdan qulaganidan darak beradi. Biroq, u aynan qayerda, qaysi balandlikdan qulagani aniqlanmadi, deb xabar bergan nashr.
Stadion qurilishi pudratchisi «Qozon» kompaniyasining bildirishicha, ishchi stadionda emas, balki yotoqxonada jarohat olgan. Aynan qayerda ekaniga oydinlik kiritilmadi.
«Haqiqatdan ham, bu yosh yigit stadion qurilishida ishlardi. Biroq 12 martda unda dam olish kuni edi. U stadionda emas, balki yotoqxonada yiqilgan va kasalxonaga olib ketilgan. Afsuski, jabrlanuvchi kecha vafot etdi. Uning oilasiga yordam ko‘rsatiladi», - deya aytib o‘tishgan «Qozon» kompaniyasidan nashrga.
Ayni damda ushbu holat bo‘yicha tekshiruv o‘tkazilmoqda, sud-tibbiy tadqiqot tayinlandi, u voqeaga oydinlik kiritishi kerak.
