Эртага, 22 ноябрь кунида ОФК қароргоҳида Осиё Чемпионлар Лигасининг 2019 йилги мавсумига қуръа ташланади.

"Локомотив" келаси йили ушбу турнирда иштирок этиш масаласини ҳал этган. Агарда "темирйўлчилар" Суперлиганинг чемпионлигини қўлга киритса, БАА, Саудия Арабистони жамоалари ва плей-офф ғолибларидан бири билан бирга "B" гуруҳидан ўрин олади.

Агарда жамоа миллий чемпионатда иккинчи ўринни қўлга киритадиган бўлса, ОЧЛни 2-саралаш босқичидан бошлайди. Бунда "Локомотив" 12 февраль куни ўз майдонида Ироқнинг "Эйр Форс" клубини меҳмон қилади. Ўйин ғолиби 19 февралда плей-офф баҳсида БААнинг "Наср" жамоаси меҳмони бўлади. Ушбу ўйин ғолиби ОЧЛнинг "D" гуруҳига йўлланма олади.

Эртага бўлиб ўтадиган қуръада қатнашиш учун "Локомотив" клуби вакиллари ҳам Малайзияга жўнаб кетишган.