Хабарингиз бор, кеча БАА да осиё кубогига старт берилди. Бу турнирга ҳозирда ҳар доимгиданда қизиқиш катта. Биз ҳам сайтимиз ҳодимлари билан мусобақани ёритиб боришга ҳаракат қиламиз
Кучсироқ кўринган БАА…
Кеча турнирни очиб берган «БАА – Бахрайн» учрашувини кузатган бўлсангиз керак. Ўйин деярли тенг курашларда ўтди. Заккерони тузган жамоа ё биринчи учрашув бўлгани учунми, ё мухлислар босимини кўтара олмадими, ёки яна бошқа сабаб борми, билмадик, лекин ўйинлари умуман қовушмади. Бахрайн эса аксинча, уюшқоқ футбол ўйнади ва қарши ҳужумларда чиройли ҳаракат қилди. Ўша куни БАА га нисбатан Бахрайн устунроқ кўринди
Осиё Кубоги кундалиги…
Турнирнинг иккинчи кунида бизни ажойиб тўқнашувлар кутиб турибди. Биринчи турда қўлга киритилган очколарнинг нақадар қадрли эканлигини ҳисобга олсак жамоалар илк турлардан қимматли очколар учун ҳақиқий жанг намойиш этишади. Бу йилги турнирда осон ўйин бўлмаслигини ва ҳамма футбол ўйнашни ўрганиб олганини кечаги ўйин кўрсатиб берди. Бахрайн майдон эгаларини сенсацион равишда мағлубиятга учратишлари мумкин эди. Сўнгги дақиқалардаги пеналтий БАА ни қутқариб қолди. Бугун Осиё кубогларида анчадан бери кўринмай қолган Ҳиндистон термаси майдонга тушади. Бу ҳам мухлисларда қизиқиш уйғотса, ажаб эмас. Сабаби Ҳиндистонда ҳозир прогресс кетмоқда…
Бизга яхши таниш Сурия термаси Фаластин билан куч синашади. Бугун биринчи турдаги энг марказий учрашувларидан бири, Австралия ва Иордания тўқнашуви. Амалдаги чемпионлар учун Иордания ҳар доим ноқулай рақиб бўлган. Бу учрашув голларга бой ўтиши кутилмоқда. Бугунги учрашувлар вақти ва тартиби қуйидагича:
Австралия – Иордания 16:00
Таиланд – Ҳиндистон 18:30
Сурия – Фаластин 21:00
Ўйинларни ўтказиб юборманг. Турнир буёғига қизигандан қизийди!
