Бугун ОЧЛ гуруҳ босқичи 2-тур учрашувлари бўлиб ўтди. Ушбу турда Саудия Арабистонининг “Ал Аҳли” жамоаси сафарда Тошкентнинг “Пахтакор” жамоасига қарши баҳс олиб борди.

Ушбу ўйинда “Ал Аҳли” мезбонларга кичик 0:1 ҳисобида мағлубиятга учради. Қизиқарли кечган баҳсдан сўнг, “Ал Аҳли” клуби футболчиси Омар Ал Сома ўз фикрларини билдириб ўтди.

“Пахтакор” жамоасига қарши жуда ҳам қийин ва қизиқарли ўйин бўлди. Рақиб жамоанинг ғалабага бўлган иштиёқи юқори бўлди. Ушбу учрашувда мағлуб бўлдик, лекин кейинги баҳсда ғалаба қозонишга ҳаракат қиламиз.

Биз мағлуб бўлиш учун бу ерга келмаган эдик. Нима ҳам дер эдим, омад бизга кулиб боқмади. “Пахтакор” кучли жамоа эканлигини бугунги ўйинда исботлади.

Стадиондаги муҳит аъло даражада бўлди. Мухлислар ҳам севимли жамоасини тинмай қўллаб-қувватлаб турди. Бир сўз билан айтганда, стадионга келган барча томошабинлар ажойиб ўйин гувоҳи бўлишди.

“Пахтакор” жамоасида 9 рақамли футболчи бизга кўп муаммо туғдирди. Ушбу футболчи учрашувнинг энг яхши футболчиси бўлди, деб бемалол айта оламан. Бу футболчи менда илиқ таассурот қолдирди. Жамоа сардори эса ҳимояда тартибли ўйин кўрсатди”, дейди Омар Ал Сома.

Жаҳонгир Сотволдиев суҳбатлашди