Bugun OCHL guruh bosqichi 2-tur uchrashuvlari bo‘lib o‘tdi. Ushbu turda Saudiya Arabistonining “Al Ahli” jamoasi safarda Toshkentning “Paxtakor” jamoasiga qarshi bahs olib bordi.

Ushbu o‘yinda “Al Ahli” mezbonlarga kichik 0:1 hisobida mag‘lubiyatga uchradi. Qiziqarli kechgan bahsdan so‘ng, “Al Ahli” klubi futbolchisi Omar Al Soma o‘z fikrlarini bildirib o‘tdi.

“Paxtakor” jamoasiga qarshi juda ham qiyin va qiziqarli o‘yin bo‘ldi. Raqib jamoaning g‘alabaga bo‘lgan ishtiyoqi yuqori bo‘ldi. Ushbu uchrashuvda mag‘lub bo‘ldik, lekin keyingi bahsda g‘alaba qozonishga harakat qilamiz.

Biz mag‘lub bo‘lish uchun bu yerga kelmagan edik. Nima ham der edim, omad bizga kulib boqmadi. “Paxtakor” kuchli jamoa ekanligini bugungi o‘yinda isbotladi.

Stadiondagi muhit a’lo darajada bo‘ldi. Muxlislar ham sevimli jamoasini tinmay qo‘llab-quvvatlab turdi. Bir so‘z bilan aytganda, stadionga kelgan barcha tomoshabinlar ajoyib o‘yin guvohi bo‘lishdi.

“Paxtakor” jamoasida 9 raqamli futbolchi bizga ko‘p muammo tug‘dirdi. Ushbu futbolchi uchrashuvning eng yaxshi futbolchisi bo‘ldi, deb bemalol ayta olaman. Bu futbolchi menda iliq taassurot qoldirdi. Jamoa sardori esa himoyada tartibli o‘yin ko‘rsatdi”, deydi Omar Al Soma.

Jahongir Sotvoldiyev suhbatlashdi