Кеча Қатарда 2018/19 йилги футбол мавсуми якунига етди. Мавсумнинг якунловчи баҳси – Қатар кубоги финалида Хави тўп тепаётган “Ас-Садд” клуби “Ал-Дуҳайл” жамоасига йирик 4-1 ҳисобида имкониятни бой берди.   Ушбу баҳс испаниялик маэстро учун профессионал футболчи сифатида фаолиятидаги сўнгги расмий ўйинга айланди. Бироқ, Хавининг хайрлашув маросимини тантанага айлантириш “Ас-Садд” жамоасига насиб этмади. Оқибатда Қатар юлдузлар лигаси-2019 ғолиби мавсумни “олтин дубль” билан якунлай олмади.   Хави 2015 йилда “Барселона” клубини тарк этгач, сўнгги уч мавсумни “Ас-Садд” клубида ўтказди. Эндиликда у мазкур клубда мураббийлик фаолиятини бошлаши кутилмоқда.   Шуни таъкидлаш жоиз, Қатар амири кубогининг финал учрашуви олдидан 2022 йилги жаҳон чемпионати учун қурилган “Ал-Вакра” стадионининг расмий очилиш маросими бўлиб ўтди. Қиймати 575 миллион долларлик мазкур стадион 40 минг томошабинга мўлжалланган. Бундан бироз аввал Доҳада худди шунча сиғимга эга “Халифа” стадиони ҳам фойдаланишга топширилган эди.