Хитойнинг Чэнду шаҳрида анъанавий Panda Cup мусобақаси ўтказилди. Ўсмирлар (U-17) жамоалари иштирокидаги турнирда Жанубий Корея термаси ғолиб чиқди.
Кореялик ўсмирлар 25-29 май кунлари гуруҳ тизими формати асосида ташкиллаштирилган мусобақада Таиланд, Янги Зеландия ва Хитой термаларини мағлубиятга учратишди. Бироқ ғалабани нишонлаш пайти Жанубий Корея ўсмирлар жамоаси футболчиларидан бири кубокнинг устига оёғини қўйиб, суратга тушди.
Бу ҳолат Чэнду футбол ассоциациясига ёқмади ва Осиё футбол конфедерациясига шикоят йўллади. Шу тариқа Жанубий Корея ўсмирлар термаси совриндан маҳрум қилинди. Якунда Ж.Корея футбол ассоциацияси расмий мактуб йўллаб, ташкилотчилардан узр сўради, терма жамоа футболчилари ҳам. Аниқроғи, ташкилотчиларга футболчилар бошлари эгик ҳолда узр сўрашган видеоёзув юборилди.
