Сосa Cola Суперлига 12-тури доирасидаги “Навбаҳор” – “Бухоро” клублари учрашуви олдидан жамоамизнинг тажрибали ярим ҳимоячиси Азим Аҳмедов фикрлари билан ўртоқлашди.
- Бизни олдинда “Бухоро”га қарши кечадиган жуда қийин ўйин кутиб турибди. Шу боис, бўлажак баҳсга қаттиқ тайёргарлик кўрдик. Гарчи яхши ўйин намойиш этаётган бўлсак-да, сўнгги баҳсларда омадимиз келмай, ғалаба қозона олмаяпмиз. Айниқса, Олмалиқдаги учрашувда тайёр ютуқни қўлдан бой берганимиз аламли бўлди ва ушбу натижа боис, жамоамиз мухлисларини ранжитиб қўйдик.
Таъкидлаш жоизки, “Навбаҳор”нинг ишқибозлари Ўзбекистонда ягона ҳамда биз доимо уларга қувонч улашиш мақсадида майдонга тушамиз.
Худо хоҳласа, бухороликлар билан бўладиган баҳсда АГМКга қарши кечган ўйинда жиддий жароҳат олган жамоадошимиз Абдужамол Исроилов, шунингдек, бизни доимо қўллаб-қувватлаб турадиган мухлисларимиз учун майдонга фақат ғалаба илинжида тушиб, ишқибозларнинг стадиондан уйларига хурсанд ҳолда қайтишлари учун бор маҳоратимизни ишга соламиз.
“Бухоро”га қарши кечадиган учрашувда ниҳоят, дуранглар сериясига чек қўйиб, ғалабали одимни бошлаймиз, деган умиддаман.
Фақат бунинг учун мухлислар ушбу ўйинда жамоамизни муносиб қўллаб-қувватлаб туришса бўлгани. Биз уларнинг юзларига табассум ҳадя этиш учун барча имкониятларимизни ишга соламиз.
“Навбаҳор” ПФК матбуот хизмати.
