Россиянинг «Локомотив» ва «Ростова» клублари собиқ бош мураббийи Леонид Кучук хизматларига Хитойнинг «Бэйцзин Гоань» клуби қизиқиш билдирмоқда.

Манбанинг тарқатган хабарига қараганда, белоруссиялик мутахассис қишда Хитойга йўл олади.

— «Бэйцзин Гоань» клуби раҳбарияти жамоанинг натижалари салбий бўлган тақдирда Кучукни жамоага олиб келиши мумкин. «Бэйцзин Гоань» клуби олдида мамлакат чемпионлигини қўлга киритиш вазифаси турибди. Агар ушбу вазифа уддаланмаса, у ҳолда жамоани Леонид Кучук бошқаради, — деди манба.

60 ёшли мутахассиснинг ўзи эса ушбу хабар ҳақида изоҳ бермаслигини айтди.

— Бу таклиф ҳақида ҳеч нарса эшитганим йўқ. Шу боис бу боради сизга ҳеч нарса айта олмайман, — деди Кучук.

«Бэйцзин Гоань» клуби чемпионат якунланишига 3 тур қолган айни паллада турнир жадвалининг учинчи поғонасини банд этиб турибди. «Гуанчжоу» клуби эса икки очко кўп жамғарган ҳолда турнир жадвалини бошқариб бормоқда.