«Реал» бош мураббийи Зайниддин Зидан «Манчестер Сити»га қарши бўлиб ўтган ўйиндан кейин фикр билдирар экан, ҳимоячи Рафаэль Варанни қўллаб-қувватлади.

«Ушбу мавсумда юқори баҳога лойиқмиз. Варанни койиманг. Биз бошимизни баланд кўтарган ҳолда янги мақсадлар сари интиламиз. Йигитларга шундай дедим. Ушбу баҳс борасида баҳона топишга ҳожат йўқ. Биз боримизни бердик, аммо баъзида бу ҳам камлик қилади.

Биз бугун хафа бўлдик, аммо бу футбол. Мағлубиятни қабул қилишдан бошқа иложимиз йўқ. Бизда вазиятлар бўлди, улардан фойдалана олмадик. Ушбу мавсумда 95% баҳсларда муваффақиятли ҳаракат қилдик. Жамоа ютқазган пайтда барча сабабини қидиради.

Ютқазган пайтингда, тан олиш керак, нимадир етишмайди. Бу тўқнашувда ҳал қилувчи палла биринчи ўйинда ютқазганимиз бўлди. Бизда тўқнашув тақдирини ўзгартириш имконияти бор эди, айниқса, иккинчи бўлимда ҳисоб 1:1 бўлиб турганида. Яна гол уришимиз мумкин эди. Аммо биз баҳона қидирмаймиз. Мен "Сити"ни ғалаба билан табриклайман ва ўз шогирдларимга миннатдорчилик билдираман», — деди Зидан.