«Ҳоким Кубоги»да ярим финал учрашувлари ўтказилди.
Финал йўлланмаси учун мезбонларга қарши майдонга тушган "Бунёдкор" қизиқарли, ҳужумкор руҳда ўтган беллашувда ажойиб ғалабани қўлга киритди. Ҳар иккала жамоа ҳам ҳужумкор ўйин намойиш қилди. Навбати билан хавфли ҳужумлар уюштиришди. Иккала жамоа томонидан урилган биттадан гол ўйиндан ташқари ҳолат сабабли инобатга олинмади.
Лекин "қалдирғочлар" эътирозларга сабаб бўлмайдиган иккита гол билан ўйин тақдирини ҳал этишди. Биринчи бўлим якунланиши арафасида Тўхтасинов-Тўраев-Қаҳрамонов-Эркиновнинг комбинациясидан кейин Шамсиддинов ўз дарвозасини ишғол этиб қўйди. Жамоалар танаффусга шу ҳисобда чиқиб кетишди.
Иккинчи бўлим ҳам биринчиси каби бошланди. Дарвозалар олдида навбатма-навбат ҳужумлар ташкил қилинди. Фақат бу футболчиларимиз мезбонлар дарвозасини иккинчи марта ишғол этишигача давом этди. 67-дақиқада 25 метрлардан «Нефтчи» дарвозаси томон жарима зарбаси белгиланди. Зарбани Қаҳрамонов тўппа-тўғри дарвозага йўллади. Акбар Тўраев тўпни муштлари билан уриб юборди. Қайтган тўпни Одилжон Абдураҳмонов дарвозага жойлади. Бу гол ўйин тақдирини ҳал қилиш билан бирга «Нефтчи» футболчиларининг шаштини ҳам пасайтирди. Якунда учрашувдаги сўнгги гол бўлиб чиқди.
«Ҳоким Кубоги-2021»
«НЕФТЧИ» - «БУНЁДКОР» - 0:2 (0:1)
1 февраль. Фарғона. «Нефтчи» спорт мажмуаси ўйингоҳи.
Бош ҳакам: Ғайрат Жўраев.
Қанот ҳакамлари: Расулжон Фозилов, Максим Нехочин.
Захирадаги ҳакам: Шоҳруҳ Аъзамов.
Назоратчи: Султон Зайлобиддинов.
«Нефтчи»: Акбар Тўраев, Шодиёр Ҳожиматов, Шавкат Муллажонов (Дарко Станоевич, 46), Тоҳир Шамсиддинов, Сайдулла Раҳматов, Худойшукур Сатторов, Шерзод Каримов (Умар Адҳамзода, 71), Абдул Азиз Юсупов (Неманья Обрадович, 46), Абдуллоҳ Олимов, Аъзам Алиев, Отабек Зокиров.
«Бунёдкор»: Равшан Ягудин, Ислом Тўхтахўжаев, Муҳаммадодил Қаҳрамонов, Абдулла Абдуллаев, Санжар Рашидов (Иброҳим Ибрагимов, 85), Суннатилла Абдуллажонов, Лутфулла Тўраев, Одилжон Абдураҳмонов (Валерий Акопов, 86), Иброҳим Томива (Хуршид Ғиёсов, 62), Шаҳбоз Эркинов (Миржаҳон Мираҳмадов, 58), Нурилло Тўхтасинов (Расул Йўлдошев, 85).
Голлар: Тоҳир Шамсиддинов, 44-ўз дарвозасига - 0:1. Одилжон Абдураҳмонов, 67 - 0:2.
Огоҳлантириш: Санжар Рашидов, 55.
