«Hokim Kubogi»da yarim final uchrashuvlari o‘tkazildi.
Final yo‘llanmasi uchun mezbonlarga qarshi maydonga tushgan "Bunyodkor" qiziqarli, hujumkor ruhda o‘tgan bellashuvda ajoyib g‘alabani qo‘lga kiritdi. Har ikkala jamoa ham hujumkor o‘yin namoyish qildi. Navbati bilan xavfli hujumlar uyushtirishdi. Ikkala jamoa tomonidan urilgan bittadan gol o‘yindan tashqari holat sababli inobatga olinmadi.
Lekin "qaldirg‘ochlar" e’tirozlarga sabab bo‘lmaydigan ikkita gol bilan o‘yin taqdirini hal etishdi. Birinchi bo‘lim yakunlanishi arafasida To‘xtasinov-To‘rayev-Qahramonov-Erkinovning kombinasiyasidan keyin Shamsiddinov o‘z darvozasini ishg‘ol etib qo‘ydi. Jamoalar tanaffusga shu hisobda chiqib ketishdi.
Ikkinchi bo‘lim ham birinchisi kabi boshlandi. Darvozalar oldida navbatma-navbat hujumlar tashkil qilindi. Faqat bu futbolchilarimiz mezbonlar darvozasini ikkinchi marta ishg‘ol etishigacha davom etdi. 67-daqiqada 25 metrlardan «Neftchi» darvozasi tomon jarima zarbasi belgilandi. Zarbani Qahramonov to‘ppa-to‘g‘ri darvozaga yo‘lladi. Akbar To‘rayev to‘pni mushtlari bilan urib yubordi. Qaytgan to‘pni Odiljon Abdurahmonov darvozaga joyladi. Bu gol o‘yin taqdirini hal qilish bilan birga «Neftchi» futbolchilarining shashtini ham pasaytirdi. Yakunda uchrashuvdagi so‘nggi gol bo‘lib chiqdi.
«Hokim Kubogi-2021»
«NEFTCHI» - «BUNYODKOR» - 0:2 (0:1)
1 fevral. Farg‘ona. «Neftchi» sport majmuasi o‘yingohi.
Bosh hakam: G‘ayrat Jo‘rayev.
Qanot hakamlari: Rasuljon Fozilov, Maksim Nexochin.
Zaxiradagi hakam: Shohruh A’zamov.
Nazoratchi: Sulton Zaylobiddinov.
«Neftchi»: Akbar To‘rayev, Shodiyor Hojimatov, Shavkat Mullajonov (Darko Stanoyevich, 46), Tohir Shamsiddinov, Saydulla Rahmatov, Xudoyshukur Sattorov, Sherzod Karimov (Umar Adhamzoda, 71), Abdul Aziz Yusupov (Nemanya Obradovich, 46), Abdulloh Olimov, A’zam Aliyev, Otabek Zokirov.
«Bunyodkor»: Ravshan Yagudin, Islom To‘xtaxo‘jayev, Muhammadodil Qahramonov, Abdulla Abdullayev, Sanjar Rashidov (Ibrohim Ibragimov, 85), Sunnatilla Abdullajonov, Lutfulla To‘rayev, Odiljon Abdurahmonov (Valeriy Akopov, 86), Ibrohim Tomiva (Xurshid G‘iyosov, 62), Shahboz Erkinov (Mirjahon Mirahmadov, 58), Nurillo To‘xtasinov (Rasul Yo‘ldoshev, 85).
Gollar: Tohir Shamsiddinov, 44-o‘z darvozasiga - 0:1. Odiljon Abdurahmonov, 67 - 0:2.
Ogohlantirish: Sanjar Rashidov, 55.
