Хабарингиз бор, бугун U-21 Биринчилигининг 1-тури доирасида "Турон" - "Қўқон-1912" (2:0) учрашуви бўлиб ўтди. Мазкур учрашув якунида ёшлар жамоамиз бош мураббийи Мурод Исмоиловнинг ўйин ҳақидаги фикрлари билан қизиқдик.

— Муроджон Музафаррович, бугунги учрашув ҳақида фикрларингиз...
— Бугун ҳақиқатдан ҳам "дерби"га хос тарзда ўтган ўйин гувоҳи бўлдик. Ҳар икки жамоа вакилларининг жисмоний тайёргарлиги юқори даражада бўлгани учрашув давомида кўзга ташланиб турди."Қўқон-1912" ёшлар жамоасида ҳам, бизда ҳам кўплаб голли вазиятлар юзага келди. Рақиблар ўз имкониятлардан фойдалана олмаганликлари туфайли бугунги баҳсда жамоамиз дарвозаси дахлсиз қолди. Бизда, яъни ёшлар жамоамизда ҳам хато ва камчиликлар бор. Бугунги ўйинда биз юзага келган имкониятларнинг 50 фоизидан унумли фойдаландик десак тўғри бўлади.

Мавсум давомида ҳар бир учрашувда ғалаба учун майдонга чиқамиз. Энг асосий мақсадимиз "Турон" учун мос футболчиларни етказиб беришдан иборат"

— Бугунги баҳсда ҳар икки жамоа таркибида тажрибали футболчилар ҳам ҳаракат қилишди. Масалан, "Қўқон-1912" (U-21) жамоаси сафида Ойбек Рустамов, Хуршид Ходжаевлар ҳаракат қилган бўлсалар, "Турон" (U-21) таркибида Суннатилло Эрматов, Исмоил Охунжонов майдонга туширилди. Мазкур ҳолат ўйин жозибаси ва натижасига қай даражада таъсир қилди деб ўйлайсиз?

— Бугунги баҳсда тажрибали футболчилар ҳам ҳаракат қилгани рост. Мусобақа ташкилотчилари ҳам U-21 Биринчилиги доирасидаги ўйинларда 2 нафар тажрибали футболчилар хизматидан фойдаланишга рухсат берган. Биласиз, ёшлар жамоаси сафида тажрибали футболчиларнинг ҳам хизматларидан фойдаланмоқдамиз. Улардаги тажриба ва малака ёш футболчиларга қўшимча мотивация бериши табиий.

— Мураббийлар штабида ўтган мавсумда "Турон" сафида ҳаракат Баҳодир Акрамовга кўзимиз тушди...
— Ҳар бир футболчи фаолиятини якунлаганидан сўнг ёшларга тўпланган тажриба ва малакаларини ўргатиш мақсадида мураббийлик фаолиятини бошлаши мумкин.Баҳодир Акрамов ҳам айни вақтда ўз тажрибаларини ёшларга ўргатиш мақсадида жамоамиз мураббийлар штабидан ўрин олган.

Бекзод Толибов ёзиб олди.