Дубайда ўтаётган «Matchworld Cup-2012» турнининг финалида «Зенит» ва Ўзбекистон олимпия терма жамоаси тўп сурса, 3-ўрин учун баҳсда Донецкнинг «Шахтёр» ва «Бунёдкор» клуби учрашишади.

Турнирда саккиз жамоа тўрттадан икки гуруҳга бўлиниб, учтадан эмас, 2 тадан учрашув ўтказиши олдиндан белгилаб қўйилган эди. Бундай ҳолатларда албатта бирор кулгили ҳолат юз бериши керак эди ва шундай бўлиб чиқди ҳам: «Бунёдкор» ўз гуруҳида Ироқ олимпия терма жамоаси билан бир хил очко тўплади. Жамоаларнинг бошқа кўрсаткичлари ҳам бир хил, боз устига улар ўзаро учрашишмаган!

Натижада гуруҳда ким иккинчи ва қайси жамоа учинчи ўрин бўлишини қуръа ёрдамида аниқлашга тўғри келган. «Спорт Экспресс» нашрининг ёритишича, ташкилотчилар қуръани қандай қилиб ўтазишни билмай бош қотиришган. Танга ташлайлик деса, маҳаллий танга – дирҳам ҳеч кимнинг чўнтагидан чиқмаган. Кутилмаганда «Бунёдкор» вакилларидан бири чўнтагидан ўзимизнинг сўм тангамизни чиқарган. У билан қуръа ташлашни ироқликлар исташмаган. Натижада тадбир «ангишвона ўйини»га ўхшаб кетган. 2 та бир хил қоғоз парчасига 2 ва 3 рақамларини ёзишган, стол устига қўйиб уларни яхшилаб айлантиришган. Хуллас, «Бунёдкор» вакилига омад кулиб боққан: айнан у танлаган қоғоз парчасида «икки» рақами «порлаб» турарди...