Англия Премьер-Лигасида жорий мавсумнинг охирги икки турида стадионга мухлислар киритилади. Бу ҳақда ташкилот расмий сайтида хабар берилди. Маълум бўлишича, 10 майдан бошлаб Британияда карантин чекловларининг юмшатилиши муносабати билан шундай қарорга келинган.
«Мухлислар 17 майдан стадионга қайтишлари мумкин бўлади. Ҳукумат 10 майдан кейин карантин чекловларини юмшатмоқчи. Премьер-Лига мавсум охирида ҳар бир клубга биттадан уй ўйинини мухлислар билан ўтказишга рухсат беришга қарор қилди. Шу сабаб мусобақадаги 37 ҳамда 38-тур ўйинлари мухлислар иштирокида ўтказилади. Клублар билан келишган ҳолда ўйинларга меҳмон жамоа мухлисларини киритмасликка қарор қилинди.
Жамоалар стадонда барча карантин талабларини бажаришлари талаб қилинади. АПЛ мухлисларни жуда соғинган ва бу 2021/22 йилги мавсумда стадионлар тўлиши учун асосий омил бўлишига умид қиламиз», дейилади баёнотда.
Маълумот учун, декабрда ҳам АПЛнинг баъзи ўйинларига чекланган миқдорда мухлислар киритилган, лекин эпидемиологик ҳолат ёмонлашгани сабаб бу енгиллик бекор қилинганди. Британияда вакцинация ортидан эпидемиологик ҳолат яхшилангани боис карантин чекловлари аста-секин юмшатилмоқда ва бу спорт мусобақаларига муҳлисларни киритишга асос бўлди.
