Хабарингиз бор, 21-22 май кунлари Иорданиянинг Амман шаҳрида осиёлик таэквондочилар ўртасида Токио-2020 Олимпия ўйинлари учун литсензион турнир бўлиб ўтади. Ушбу мусобақада Ўзбекистондан 3 нафар (1 нафар эркак ва 2 аёл) спортчи иштирок этиш ҳуқуқига эга.
Ўзбекистон таэквондо WТ ассоциациясининг маълум қилишича, терма жамоа мураббийлар штаби олиб борилган йиғинлар ва сўнгги мусобақалардан келиб чиқиб ушбу муҳим турнирда кимлар қатнашиши борасида якуний қарорга келди.
Демак, Амман шаҳридаги литсензион турнирда Ўзбекистон шарафини Улуғбек Рашитов (-58 кг), Нигора Турсунқулова (-67 кг) ҳамда Светлана Осипова (+73 кг) ҳимоя қиладиган бўлишди.
Эслатиб ўтамиз, литсензион мусобақада финалга чиққан таэквондочилар Токиода ўтадиган Олимпиадага йўлланмани қўлга киритишади.













