Жаҳон чемпионатининг саралаш босқичи "D" гуруҳи учрашувлари Саудия Арабистонида ташкил этилганидан хабарингиз бор. Ўзбекистон терма жамоаси бугун Ар-Риёдда ўзининг дастлабки баҳсини ўтказди. Вадим Абрамов шогирдлари Сингапурга қарши майдонга тушиб, йирик ҳисобда ғалаба қозонишди.

Вакилларимиз тезкор гол уришга муваффақ бўлди. Алибоевнинг чиройли узатмасидан кейин Машарипов 10 метрлардан аниқ зарба йўллади. Тўп эса устунга тегиб, чизиқни кесиб ўтди.

Баҳснинг 35-дақиқасига келиб Жалолиддиннинг ўзи иккинчи марта Сингапур дарвозасини забт этди. Дастлаб Шомуродовнинг яккама-якка вазиятда йўлланган зарбасини рақиб посбони қайтарди, қайтган тўпни эса Машарипов эгаллади ва аниқ зарба билан дарвозани ишғол қилди.

Биринчи бўлим давомида 3та имкониятдан фойдалана олмаган Шомуродов эса қўшиб берилган дақиқаларда ўз мақсадига эришди. Элдор қанотдан етказилган узатмани кўкраги билан ўзига бўйсундирди ва ўнг оёқда зарба бериб, ҳисобни йирик кўринишга келтирди.

Иккинчи бўлим аввалида гол уриш навбати Одил Аҳмедовга келди. Терма жамоамиз қарши ҳужум ташкил қилди. Алижоновнинг узатмасидан кейин сардоримиз жарима майдонига кирди ҳамда яккама-якка вазиятда дарвозабонни доғда қолдирди.

Ўйин сўнгида эса Аҳмедов жарима майдонига узатма бераётган пайтда тўп Сингапур ҳимоячиси Фандининг бошига тегиб, тўрга бориб тушди — 5:0.

Ўзбекистон терма жамоаси ушбу ғалабадан сўнг ўз очколарини 12тага етказиб олди.

ЖЧ-2022 саралаш. Осиё минтақаси, 2-босқич. 8-тур
Ўзбекистон - Сингапур - 5:0 (3:0)
Голлар: Жалолиддин Машарипов (6, 35), Элдор Шомуродов (45+2), Одил Аҳмедов (50), Фанди (89-автогол)
Ўзбекистон – Санжар Қувватов, Ҳусниддин Алиқулов (Ҳожиакбар Алижонов 45), Умарбек Эшмуродов,  Исломжон Қобилов, Олег Зотеев, Отабек Шукуров (Одил Ҳамробеков 55), Одил Аҳмедов, Икром Алибоев, Жалолиддин Машарипов (Фаррух Икромов 55), Достонбек Ҳамдамов (Ҳожимат Эркинов 46, Темурхўжа Абдухолиқов 60), Элдор Шомуродов
Сингапур – Изван Маҳбуд, Мамдху Мохана, Байхакки Хайзан, Шакир Хамза, Назрул Назари, Шаҳдан Сулаиман, Зулфахми Арифин, Хафиз Сужад, Хаззуван Халим, Фарис Рамли, Ясир Ханапи