Jahon chempionatining saralash bosqichi "D" guruhi uchrashuvlari Saudiya Arabistonida tashkil etilganidan xabaringiz bor. O‘zbekiston terma jamoasi bugun Ar-Riyodda o‘zining dastlabki bahsini o‘tkazdi. Vadim Abramov shogirdlari Singapurga qarshi maydonga tushib, yirik hisobda g‘alaba qozonishdi.

Vakillarimiz tezkor gol urishga muvaffaq bo‘ldi. Aliboyevning chiroyli uzatmasidan keyin Masharipov 10 metrlardan aniq zarba yo‘lladi. To‘p esa ustunga tegib, chiziqni kesib o‘tdi.

Bahsning 35-daqiqasiga kelib Jaloliddinning o‘zi ikkinchi marta Singapur darvozasini zabt etdi. Dastlab Shomurodovning yakkama-yakka vaziyatda yo‘llangan zarbasini raqib posboni qaytardi, qaytgan to‘pni esa Masharipov egalladi va aniq zarba bilan darvozani ishg‘ol qildi.

Birinchi bo‘lim davomida 3ta imkoniyatdan foydalana olmagan Shomurodov esa qo‘shib berilgan daqiqalarda o‘z maqsadiga erishdi. Eldor qanotdan yetkazilgan uzatmani ko‘kragi bilan o‘ziga bo‘ysundirdi va o‘ng oyoqda zarba berib, hisobni yirik ko‘rinishga keltirdi.

Ikkinchi bo‘lim avvalida gol urish navbati Odil Ahmedovga keldi. Terma jamoamiz qarshi hujum tashkil qildi. Alijonovning uzatmasidan keyin sardorimiz jarima maydoniga kirdi hamda yakkama-yakka vaziyatda darvozabonni dog‘da qoldirdi.

O‘yin so‘ngida esa Ahmedov jarima maydoniga uzatma berayotgan paytda to‘p Singapur himoyachisi Fandining boshiga tegib, to‘rga borib tushdi — 5:0.

O‘zbekiston terma jamoasi ushbu g‘alabadan so‘ng o‘z ochkolarini 12taga yetkazib oldi.

JCH-2022 saralash. Osiyo mintaqasi, 2-bosqich. 8-tur
O‘zbekiston - Singapur - 5:0 (3:0)
Gollar: Jaloliddin Masharipov (6, 35), Eldor Shomurodov (45+2), Odil Ahmedov (50), Fandi (89-avtogol)
O‘zbekiston – Sanjar Quvvatov, Husniddin Aliqulov (Hojiakbar Alijonov 45), Umarbek Eshmurodov,  Islomjon Qobilov, Oleg Zoteev, Otabek Shukurov (Odil Hamrobekov 55), Odil Ahmedov, Ikrom Aliboyev, Jaloliddin Masharipov (Farrux Ikromov 55), Dostonbek Hamdamov (Hojimat Erkinov 46, Temurxo‘ja Abduxoliqov 60), Eldor Shomurodov
Singapur – Izvan Mahbud, Mamdxu Moxana, Bayxakki Xayzan, Shakir Xamza, Nazrul Nazari, Shahdan Sulaiman, Zulfaxmi Arifin, Xafiz Sujad, Xazzuvan Xalim, Faris Ramli, Yasir Xanapi