Футзал клублари ўртасидаги Осиё Чемпионлар Лигасининг Тошкентда бўлиб ўтадиган саралаш ўйинлари вақти тасдиқланди.

19-24 март кунлари Тошкент шаҳрида футзал клублари ўртасидаги Осиё Чемпионлар Лигаси финал босқичи йўлланмаси учун саралаш баҳслари бўлиб ўтади. Футзал бўйича Ўзбекистон чемпиони — «Ардус» мезбонлигида ўтадиган ўйинларда Ғарбий минтақанинг бошқа тўрт вакили — Қатарнинг «Ар-Райян», Ироқнинг «Ал-Карх», Қирғизистоннинг «Налоговик» ва БААнинг «Ал-Васл» жамоалари иштирок этишади.

19 март, душанба кунидан бошлаб ҳар куни (дам олиш куни қилиб белгиланган 22 март, пайшанбадан ташқари) 16:00 ва 19:00да ўйинлар ўтказилади. Барча учрашувлар «Ўзбекистон» спорт мажмуасида бўлиб ўтади.

Александр Петров бош мураббийлигидаги «Ардус» жамоаси 19 март куни соат 16:00да БААнинг «Ал-Васл» жамоасига қарши ўйин билан саралаш ўйинларини бошлаб беради. Ўзбекистон чемпиони 2-турда «Налоговик»га қарши майдонга тушса, 3-турда дам олади. Икки кун дам олган «Ардус» 4-турда ироқликларга қарши тўп суради. Дам олиш кунигача «Ардус» ўз учрашувларини 16:00да бошласа, сўнгги икки турда 19:00да майдонга чиқади. Саралашни «Ардус» ҳамда Қатарнинг «Ар-Райян» клублари ўртасидаги учрашув якунлаб беради.

Футзал клублари ўртасидаги ОЧЛ
«А» саралаш гуруҳи тақвими

1-тур. 19 март, душанба
16:00. «Ардус» (Ўзбекистон) – «Ал-Васл» (БАА)
19:00. «Ар-Райян» (Қатар) – «Налоговик» (Қирғизистон)

2-тур. 20 март, сешанба
16:00. «Налоговик» (Қирғизистон) – «Ардус» (Ўзбекистон)
19:00. «Ал-Васл» (БАА) – «Ал-Карх» (Ироқ)

3-тур. 21 март, чоршанба
16:00. «Ал-Карх» (Ироқ) – «Ар-Райян» (Қатар)
19:00. «Ал-Васл» (БАА) – «Налоговик» (Қирғизистон)

22 март — дам олиш куни

4-тур. 23 март, жума
16:00. «Ар-Райян» (Қатар) – «Ал-Васл» (БАА)
19:00. «Ал-Карх» (Ироқ) – «Ардус» (Ўзбекистон)

5-тур. 24 март, шанба
16:00. «Налоговик» (Қирғизистон) – «Ал-Карх» (Ироқ)
19:00. «Ардус» (Ўзбекистон) – «Ар-Райян» (Қатар)