«Golden Boy» мукофоти Европадаги энг кўзга кўринган ва ажойиб натижалар қайд этган ёш футболчиларга тақдим этиб келинади. Ушбу мукофот 2003 йилда итальян ҳафталик журнали бўлган «Tuttosport» томонидан жорий этилади. Ғолиб бир календарь йили мобайнида энг кўп гапирилган ва муҳокамаларга сабаб бўлган номзодлар ичидан танлаб олинади. Албатта, ушбу тизим ҳам овоз беришга асосланган бўлиб, унда Европанинг энг машҳур ва ишончли нашрлари иштирок этади. Бугунги кунда ушбу нашрларнинг рўйхати қуйидагича:
1. «Bild»(Германия), 2. «Blick»(Швейцария), 3. «l'Équipe»(Франция), 4. «France Football»(Франция), 5. «Marca»(Испания), 6. «Mundo Deportivo»(Испания), 7. «Ta Nea»(Греция), 8. «Sport Express»(Россия), 9. «De Telegraaf»(Нидерландия), 10. «Times»(Бирлашган Қироллик).
«Барселона» футболчиси Педри «Golden Boy-2021» ғолибига айланди. У кучли учликда Жюд Беллингем ҳамда Жамал Муcиала билан беллашган эди. Испаниялик футболчи ҳақиқатдан ҳам йилни ажойиб ўтказди. У 2021 йилда жами 71 марта майдонга туширилган. Қитъа чемпионатида Испания таркибида эди. Шунингдек, Педри Токиода кумуш медални қўлга киритди. Рўйхатнинг кучли бешлигида, шунингдек, «Леверкузен» футболчиси Флориан Вирц ҳамда «Барса»нинг яна бир истеъдоди Гави ҳам бор эди. Аммо соврин Педрига насиб этди. Қуйида эътиборингизга ушбу совриннинг сўнгги ўнта соҳибини ҳавола этамиз.
1. Эрлинг Холанд (2020)
2019-20 йилги мавсумда Холанд «BVB» ҳамда «Зальцбург» сафида барча турнирларда жами 44та гол урган эди. Бу эса соврин учун курашда уни мутлақ ғолибга айлантирди. У ўтган мавсумда ҳам топ перформер бўлди. 41та ўйинда 41та гол урган Холанд, қисқа вақт ичида катта юлдузга айланди. Фақатгина жароҳат, уни бу серияни давом эттиришига йўл қўймади.
2. Жуан Феликс (2019)
Феликс номи бизга Португалия чемпионатидан таниш. У ўзининг дебют мавсумидаёқ 15та гол ҳамда 7та ассистни расмийлаштирган эди. Феликс Португалия терма жамоасида Миллатлар Лигаси мусобақасининг ярим финалида дебют қилади ва турнир бош совринини қўлга киритади. 21 ёшли футболчи 17 марта терма жамоада кўриниш берган.
3. Маттейс де Лигт (2018)
Де Лигт 2018 йилги совринни ютган эди. У ўша пайтда «Аякс» марказий ҳимоячиси сифатида ҳаракат қиларди. Футболчи ўша йили мамлакат кубогини, кейин эса бош совринини ҳам қўлга киритди. Ўз жамоасини сардор сифатида ЕЧЛ ярим финалигача етаклай олган де Лигт, кейинчалик «Ювентус»га йўл олади. У бир маротаба Италия чемпиони ҳам бўлишга улгурди.
4. Килиан Мбаппе (2017)
Ҳозирда 22 ёшли ҳужумчи, 2018 йилда «Монако»дан «ПСЖ»га ижарага ўтади. Унинг сотиб олиш шартидаги нархи 160 миллион фунт этиб белгиланган эди. У «Монако»даги фантастик ўйинлари сабаб, ушбу мукофотни қўлга киритганди. Килиан ҳозирда дунёнинг энг машҳур футболчилари бўлган Месси ва Неймар билан ҳаракат қилади. Мбаппе ҳозиргача проффесионал тарзда 188та учрашув ўтказиб, 140 марта гол уришга эришган.
5. Ренато Санчеш (2016)
«Лилль» вакили Евро-2016 финалидаги кутилмаган голи сабаб бу мукофотни қабул қилиб олганди. «Бавария»га 35 миллион фунтлик кўчишидан кейин, у бир йилни заҳирада ўтказди. У ўша йили Карло Анчелотти томонидан фақат 6 марта майдонга туширилган, холос. Бундай катта омадсизликдан сўнг, у «Лилль»га келди ва тез орада Франция чемпионига айлана олди. У ҳозир ҳам ўз жамоасининг асосий футболчиларидан биридир.
6. Антони Марсьяль (2015)
Одамлар «МЮ» Марсьялни «Монако»дан 36 миллионга сотиб олинганида Эд Вудвард устидан кулишганди. Аммо ҳужумчи ўзини кўрсата олди. У 2019-20 йилги мавсумда 23 гол уришга эришган. Бироқ шундан кейин унинг темпи анча пасайиб қолди.
7. Раҳим Стерлинг (2014)
Унинг «Ман Сити»га можароли кўчиши ҳаммаёқда катта шов-шув бўлади. Шунга қарамай, Англия терма жамоаси аъзоси ўзига сарфланган пулларни оқлай олди. У голлари ва голли узатмалари билан «шаҳарликлар»нинг 2018 ҳамда 2019 йилги кетма-кет чемпионлигига муносиб ҳисса қўшган. Стерлинг клуби билан 2023 йилгача янги битим тузган.У бу мавсумда ҳам ажойиб ўйин кўрсатмоқда. Хусусан, унинг сўнгги турда «Эвертон»га урган голи мухлисларни ўзига маҳлиё қила олди.
8. Поль Погба (2013)
Баққуват ва серғайрат ярим ҳимоячи «Golden Boy» совринини олган пайтида «Ювентус»да ҳаракат қиларди. Погба бундан беш йил олдин ўша пайтда дунё рекорди бўлган 89 миллион фунт эвазига «МЮ»га ўтади. Амалдаги Жаҳон чемпиони бу мавсумда жароҳат олганига қадар яхши ўйин намойиш этаётган эди.
9. Иско Аларкон (2012)
Испания бугунги кунда дунё футболининг ярим ҳимоячи етказиб берувчи «завод»ига айланиб қолган. Иско ушбу заводдан чиққан илк маҳсулотлардан бири эди. Майдон марказида ўйнаш осон эмаслигини ҳамма билади. У эса бу ишни қойилмақом қилиб уддалар эди. Айниқса, «Малага»даги пайтида Иско пишиб етилади. У «Реал»нинг асосий футболчиси бўлишга узоқ йиллар уринди. Футболчи бунга жуда ҳам қийналди. Аммо унинг маҳорати барчанинг меҳрини қозона олган.
10. Марио Гётце (2011)
«ПСВ» вакили бўлган Гётце, бир пайтлар энг кучли футболчилар қаторида эди. Унинг фаолияти қилган энг катта хатоси «BVB»дан «Бавария»га йўл олганидир, балки. Аммо футболчининг ҳозирги совринлар кабинетига назар солсангиз, у унчалик ҳам катта хато қилмаганига гувоҳ бўласиз. Шундай бўлсада, Гётце Германия чемпиони сафида ўзи истагандек ўйнай олмади. Футболчининг ҳаёти давомида қилган энг ажойиб ишларидан бири эса 2014 йилги Жаҳон чемпионати финалида гол ургани бўлди. Ҳа, ҳақиқатдан ҳам Гётце номини ҳозир ҳам ўша гол билан эслаймиз.
инглиз тилидан Жалолиддин ИСМАТОВ таржимаси
