Истанбул шаҳрида якунига етган УЕФА ХХХVI Конгресси доирасида УЕФА ва ЕКА (Европа клублари ассоцияцияси) ўртасида 2012 йилдан 2018 йилгача бўлган муддатга ўзаро ҳамкорлик келишуви имзоланди. Келишувни Руммениге ва УЕФА президенти Мишел Платини имзоладилар. Ушбу ҳужжат Европа футболи бошқарув органи билан Европа клублари ассоцияцияси ўртасида истиқболли ҳамкорлигига асос бўлиб хизмат қилади.
Ушбу меморандумга кўра УЕФА июнь ойидан бошлаб футболчиларнинг терма жамоада бўлган вақтидаги соғлиқларини суғурталаш мажбуриятини ўз зиммасига олади. Суғурта барча футболчиларга, уларнинг фуқаролигидан қатъий назар, жорий қилинади. Бундан ташқари, клублар турнир ўтказилишидаги катта хизматлари учун Евро-2012 мусобақасидан тушган даромаддан 100 миллион евро миқдорида мукофот оладилар. Бу миқдор Францияда ўтказилиши кўзда тутилаётган Евро-2016 мусобақаси арафасида 150 миллион еврони ташкил этади.
УЕФАнинг муҳим қарорларини қабул қилишда ҳам клубларнинг роли оширилди. Янги ҳалқаро тақвим варианти ишлаб чиқилди ва бу тақвим ФИФА Ижроия қўмитаси тасдиғига тақдим этилади. График икки йилга сочилган тўққизта икки ўйинли учрашувлардан иборат бўлади. Бунда ўртоқлик ўйинлари кўзда тутилмаган. Август ойидаги ўртоқлик ўйинлари эса бекор қилинади.
