«Ювентус» мураббийи Марко Ландуччи Италия кубогининг нимчорак финал босқичи доирасида бўлиб ўтган «Сампдория»га қарши ўйин (4:1) борасида ўз фикрини билдириб ўтди.

«Биз яхши ўйин намойиш этдик. Аммо буни амалга ошириш осон бўлмади. Боиси, стадионда мухлислар кам эди. Биз ўйинга руҳий жиҳатдан тўғри ёндашдик, кейинги босқичга чиқишимиз муҳим аҳамиятга эга эди. Ахир Италия кубоги — ажойиб мусобақа. Бугун барча жуда яхши ўйнади.

Сафимизда етакчи футболчилар бўлмаганда ҳам биз юқори иштиёқ билан кўп ўйинларни ўтказдик. Ҳеч бир ўйин енгил ўтмаяпти. Масалан, «Верона», «Эмполи» ва «Удинезе» каби кичик кўринган клубларга қарши баҳсларда биз кўп очко йўқотдик.

Асосийси – бу сидқидилдан меҳнат, иштиёқ ва хоҳиш. Ҳозирда барқарорликка эга бўлиб боряпмиз. Буни эса сўзларимиз эмас, ишимиз кўрсатиши керак», – деди Ландуччи.