Англиянинг "Манчестер Юнайтед" клуби раҳбарияти апрель ойининг охиригача янги бош мураббий масаласидаги муаммони тўлалигича ҳал қилиб қўйишга умид қилмоқда.
1 март куни "Манчестер Юнайтед" спорт директори Жон Мерто раҳбарият аллақачон янги бош мураббий билан музокара ўтказишни бошлаб юборганини тасдиқлаганди.
Бироз аввалроқ, "қизил иблислар" воситачилар орқали "Аякс" устози Эрик Тен Хаг билан музокаралар олиб бораётганлиги ҳақида хабарлар тарқалди.
Тен Хагдан ташқари, "қизил иблислар"нинг рўйхатидан "ПСЖ" бош мураббийи Маурисио Почеттино, "Реал" устози Карло Анчелотти ва Испания терма жамоаси бош мураббийи Луис Энрикелар жой олган. Булардан ташқари, раҳбарият Ральф Рангникни ҳам жамоада олиб қолиши мумкин.
Daily Mail нашрининг тарқатган маълумотига қараганда, клуб спорт директори Мерто ва ижрочи директор Ричард Арнольдлар янги бош мураббий борасидаги якуний қарорни мавсум охиригача чўзиб ўтирмасдан, келаси ойнинг охиригача ёпишга ҳаракат қилишмоқда.
