Angliyaning "Manchester Yunayted" klubi rahbariyati aprel oyining oxirigacha yangi bosh murabbiy masalasidagi muammoni to‘laligicha hal qilib qo‘yishga umid qilmoqda.
1 mart kuni "Manchester Yunayted" sport direktori Jon Merto rahbariyat allaqachon yangi bosh murabbiy bilan muzokara o‘tkazishni boshlab yuborganini tasdiqlagandi.
Biroz avvalroq, "qizil iblislar" vositachilar orqali "Ayaks" ustozi Erik Ten Xag bilan muzokaralar olib borayotganligi haqida xabarlar tarqaldi.
Ten Xagdan tashqari, "qizil iblislar"ning ro‘yxatidan "PSJ" bosh murabbiyi Maurisio Pochettino, "Real" ustozi Karlo Anchelotti va Ispaniya terma jamoasi bosh murabbiyi Luis Enrikelar joy olgan. Bulardan tashqari, rahbariyat Ralf Rangnikni ham jamoada olib qolishi mumkin.
Daily Mail nashrining tarqatgan ma’lumotiga qaraganda, klub sport direktori Merto va ijrochi direktor Richard Arnoldlar yangi bosh murabbiy borasidagi yakuniy qarorni mavsum oxirigacha cho‘zib o‘tirmasdan, kelasi oyning oxirigacha yopishga harakat qilishmoqda.
