"Ливерпуль" ва Англия терма жамоасининг собиқ ҳимоячиси Жейми Каррагер "Манчестер Юнайтед" ярим ҳимоячиси Поль Погбанинг "Манчестер Сити"га ўтиши мумкинлиги ҳақида ўз фикри билан ўртоқлашди.
Собиқ футболчи "шаҳарликлар" раҳбариятига 29 ёшли французга яқинлашмасликни маслаҳат берди, чунки Погба бу жамоа шарафини ҳимоя қилиш учун етарлича салоҳиятга эга эмас.
“Мен уни жамоага яқинлаштирмаган ҳам бўлардим. Балки Гвардиола Погбани олдинги ўйинларини тиклашга ёрдам берар, лекин у ҳар бир ўйинда 100% куч билан ўйнайди деб ўйламайман", - дея Каррагернинг сўзларини келтиради Sky Sports.
Аввалроқ Погба "Манчестер Сити"га ўтишдан бош тортгани хабар қилинганди. Ярим ҳимоячи хизматларига “Ювентус”, “Реал” ва “ПСЖ” ҳам қизиқиш билдирмоқда.
Жорий мавсумда франциялик футболчи манкунианликлар сафида 27 та ўйин ўтказиб, 1 та гол ва 9 та голли узатмани амалга оширди.