Ўзбекистон U-23 терма жамоаси бош мураббийи Тимур Кападзе Эронга қарши бўлиб ўтган 3-тур баҳсидан кейин матбуот анжуманида иштирок этди.

Ўйин ҳақида

— Бугунги ўйинда барча яхши ҳаракат қилди. Афсуски ғалаба қозона олмадик. Ўйинга келадиган бўлсак, учрашув шиддатли бўлди. Эронга ғалаба керак эди. Биз кейинги босқич йўлланмасини ҳал қилган бўлсак ҳам, бу ўйинни муҳим санаб, чиройли ўйин кўрсатишга ҳаракат қилдик. Эндиликда бор эътиборимизни кейинги босқич учрашувига қаратамиз.

Ротация ҳақида

— Биз барча футболчиларни текшириб олишимиз керак эди. Бугунги ўйин орқали уларни руҳий ва жисмоний томондан синаб олдик. Бугунги учрашувда етарлича вазиятлар бўлди. Норчаев ва Эркиновда ҳам ажойиб имкониятлар юзага келди. Умуман олганда, ҳамма ўз ишини яхши бажарди.

Кейинги учрашувларга келсак, ким тайёр бўлса, ўшалар майдонга тушади. Биз олдимизга юқори мақсад қўйганмиз. Шу сабабли, муносиб футболчиларни майдонга туширамиз. Энг муҳими, ҳамма футболчиларимизда асосий таркибда майдонга тушиш учун етарлича потенциал бор. Айтганимдек, ким тайёр бўлса, шу бошланғич таркибдан жой олади.

Ироқ терма жамоаси ҳақида гапирадиган бўлсам, рақиб кучли жамоа. Ўзи аслида, бу босқичда кучсиз жамоанинг ўзи йўқ. Ироқлик футболчилар яхши ҳаракат қилишади. Биз ушбу ўйинга муносиб тайёрланамиз деб ўйлайман.