Футзал бўйича Ўзбекистон миллий терма жамоаси Дубайнинг "Ал Шабоб" спорт мажмуасига етиб келди.

Бугун, маҳаллий вақт билан соат 14:30да Хосе Мария Мендез шогирдлари XII Осиё чемпионати доирасида ўзларининг иккинчи учрашувини ўтказишади. Кувайт билан бўлиб ўтган учрашувда дуранг натижани қайд этган Ўзбекистон терма жамоаси аъзолари мусобақадан олдин уларнинг гуруҳ босқичидаги асосий рақиби ҳисобланган Хитой терма жамоасига қарши тўп суришади. Гуруҳда биринчи ўринни эгаллаш ва шу орқали Осиёнинг энг кучли жамоаси ҳисобланмиш Эрон билан бўладиган баҳсдан ўзларини олиб қочиш учун жамоамиз, албатта, Хитойни мағлуб этиши керак, акс ҳолда вазият жуда чигаллашиб кетади.

Ушбу нарсани жуда яхши тушуниб турган Мендез, бугун ўз шогирдларига турли кўрсатмалардан ташқари, жуда таъсирли бўлган ва унинг ўзи томонидан махсус тайёрланган видеолавҳаларни намойиш этди. Ушбу видеолавхалар узоқ ойлар давомида қилинган катта ҳажмдаги ишлар, футболчиларни ва уларнинг оила аъзолари туширилган расм ва видеоларни ўз ичига олди. Айтиш керакки, Мендезнинг ушбу ҳаракати терма жамоа аъзоларининг руҳини ва ўзларига бўлган ишончни кучайтирди.

Бугун, шунингдек, бутун делегация аъзолари терма жамоанинг асосий дарвозабони - Рустам Умаровни таваллуд айёми билан табриклашди.

Бахтиёр Маметов
Дубай, БАА