Гуруҳ босқичида Ўзбекистон футзал терма жамоаси билан дуранг қайд этган (1:1) Кувайт шу йилнинг ноябрь ойида Таиландда бўлиб ўтадиган жаҳон чемпионатининг бешинчи иштирокчисига айланди.

Барчаси нарса айнан Таиланд термасига боғлиқ бўлиб турганди. Херманс Виктор шогирдлари Осиё чемпионатида қайд этилган натижадан қатъий назар, жаҳон чемпионати мезбони сифатида мундиалда иштирок этиш ҳуқуқига эга эдилар. Шунга қарамай чорак финалда Ливанга қарши залга чиққан тай футзалчилари 5:3 ҳисобида устун келиб, ярим финал йўлланмасига қўлга киритдилар. Бунинг натижасида чорак финалда қоқилган тўрт жамоа орасидан энг яхши кўрсаткич қайд этган мамлакатда ҳам жаҳон чемпионати йўлланмасини қўлга киритиш имкони пайдо бўлди.

Таиланд билан параллел равишда Осиёнинг 10 карра чемпиони – Эронга қарши кураш олиб борган Ўзбекистон 3:6 ҳисобида имкониятни бой бериб, мундиал орзусини йўққа чиқарди. Олдинда чорак финалнинг яна 2та ўйини бўлсада, Таиланддан мағлуб бўлган Ливан ҳам Хосе Мария Мендез жамоасидан яхшироқ натижа қайд этиб турганди.

Кейинги иккита ўйиннинг биринчисида Қирғизистон Японияга 0:1 ҳисобида имкониятни бой берди. Кичик ҳисобда енгилгани сабабли Қирғизистон термаси ҳам мундиалга анча яқин турганди. Бироқ Кувайт бунга йўл қўймади. Австралия билан ўйинда 2:2 ҳисобида дуранг ўйнаган Фонсека Гильерос жамоаси, қўшимча вақтда 1та гол ўтказиб юбориб, ярим финал остонасида қоқилди. Бу эса ўз навбатида Кувайтга мундиалнинг бешинчи иштирокчиси бўлиш бахтини тақдим этди.

Шу тариқа 2012 йилнинг ноябрь ойида Таиландда бўлиб ўтадиган жаҳон чемпионатида мезбонларнинг ўзидан ташқари – Эрон, Япония, Австралия ва Кувайт термалари ҳам Осиё қитъаси шарафини ҳимоя қилишади. Амалдаги вице-чемпион Ўзбекистон эса чорак финалда мағлуб бўлган жамоа сифатида ортга қайтади. Қайд этиш керак, бугун – 30 май куни Осиё чемпионатининг ярим финал ўйинлари бўлиб ўтади. Дастлаб Таиланд Эронга қарши залга чиқса, иккинчи беллашувда Япония Австралияни синовдан ўтказади.