"Ман Сити" оиласига яна бир клуб қўшилди: City Football Group холдинги "Палермо"нинг 80% акцияларини 13 миллион еврога сотиб оладиган бўлди. Битим якунланиш арафасида.
Италия жамоаси учун бу нажот йўли десак ҳам бўлади. 2019 йилнинг май ойида клуб Б серияда учинчи ўринни эгаллади ва элитага чиқиш учун плей-офф ўйинларига тайёргарлик кўраётган эди, аммо жамоа молиявий муаммолар туфайли профессионал мақомдан маҳрум бўлди. Бу клуб учун албатта, катта йўқотишдир.
Бироқ "Палермо" таслим бўлмади ва ҳаваскорлар клуби сифатида Д Серияга (Италиянинг тўртинчи дивизиони) кирди. 2019/20-йилги мавсумнинг биринчи даврасидаёқ стадионга 17 000 мухлис ташриф буюрди ва лига рекордини янгилади.
Жамоа дарҳол C серияга чиқди ва бир мавсумдан сўнг Б серияга ҳам қайтишга муваффақ бўлди - улар плей-офф финалида "Падова"ни мағлуб этишди. Шу тариқа, "Палермо" энди янги эгалари билан А Серияда ҳам янги ютуқларни эгаллашга ҳаракат қилиб кўради.
Хўш, бу ҳамкорлик "Палермо"га нима беради?
City Football Group - ҳақиқий йирик империя. У йирик бозорлар орқали клубларни сотиб олади ва уларнинг “Манчестер Сити” даражасида кучайиши устида ишлайди – бу орқали холдингнинг асосий лойиҳаси реклама қилинади. Бу империя корпоратив маданиятга эга: логотипларнинг бир хиллиги, ранглар (агар иложи бўлса, бу "Палермо"га таъсир қилиши даргумон), исмлар ва Пеп намунасидаги ҳужум услуби. Барчаси ажойиб.
Стадионлар ёнидаги фан-дўконларда улар нафақат маҳаллий жамоаларнинг, балки яхлит корпорацияга ҳам тегишли бўлган товарларни сотишади.
Deloitte аудиторлик фирмаси ҳамкори Фернандо Понс шундай дейди: "Жирона" мухлиси ёки "Нью-Йорк" мухлиси шубҳасиз, "Сити" мухлисига айланади. Бу бренд бутун дунёга ёйилмоқда ва жамоа тўғри йўлда", - дейди функционер.
"Ман Cити" бренди логотипсиз ҳам сотилиши мумкин. Қандай қилиб дейсизми? Бу ерда турли хил глобал футбол мактаблари мавжуд бўлиб, улар ҳаваскор мураббийларга қўлдан келганча ёрдам беради. Бу ҳам албатта, катта бизнес. Тактика ва ўйин услуби орқали бутун тизим дунёга ёйилади.
Бошқа клублар Гвардиоланинг қарашларини ўзлаштиришга ҳаракат қилишади. "Биз барча клубларимизда барқарор бўлишга ҳаракат қиламиз", - дейди глобал тармоқларга жавобгар футбол директори Брайан Марвуд The Guardian нашрига берган интервьюсида. "Баъзида одамлар: “Сиз билан ишласам бўладими?, деб ҳам мурожаат қилишади. Мен Пеп каби ўйнай оламан" - Яхши, қандай қилиб айтинг. "Бу 4-3-3." Йўқ, Пепнинг услуби бундан ҳам юқорироқ. Кўрсатмалар, чизиқлар бўйлаб интенсив ҳаракат, ранг-баранг комбинациялар, тўпга эгалик қилиш, ҳамма-ҳаммаси бу ерда ўзгача".
Бунинг эвазига CFG клуб жиҳозларини ҳам янгиламоқда. Ҳар бир филиал шаҳар стандартларига мос келиши керак - улар махсус қўлланмада мустаҳкамлаб қўйилган. Шунинг учун, биринчи навбатда, CFG аудит ўтказади - гўё машинани ажратиб олиб, уни истакларга кўра қайта йиғиш каби жараёндан иборат.
Шайхлар эски базани таъмирлайди ёки янгисини қуради, кенг соҳаларни қамраб олади, бизнес жараёнларини қайта бошлайди ва академияни модернизация қилади. Янги клуб эгалари барча майда-чуйда нарсалар билан шуғулланади - улар тиббиёт хонасига (Мельбурн) эшиклар киритишади ёки клуб автобусини (Монтевидео) сотиб олишади. CFG бир танадаги қон айланиш тизимига ўхшайди, чунки у футбол билими ва фалсафасини бутун дунёга тарқатади. Ходимлар ва шифокорлар доимий равишда стажировкадан ўтадилар, улар мураббийларга клуб ривожланишида ҳар томонлама ёрдам беришади: Пепнинг машғулотлари видеога ёзиб олинади ва махсус маълумотлар базасига киритилади. Баъзида мураббий келиб, раҳбариятга турли масалаларда маслаҳат бериши ҳам мумкин.
Холдингнинг бошқа клубларида вазият қандай?
• "Троя" Лига 2да уч мавсумдан сўнг 1-лигага қайтди ва бир тур қолганда иккинчи дивизион чемпионига айланди. Ўтган мавсумда жамоа элитада қолди, комбинациялар қилишга ва қисқа пас орқали ҳимоядан чиқиб кетишга ҳаракат қилади. Бу ерда Адил Рами ўйнайди.
• "Жирона" кейинги мавсумдан Ла Лигада ўйнайди, бир қатор ўзгаришлар амалга оширилди, жумладан, итларга стадионга киритилишга рухсат берилади. Клуб холдинг билан жуда яқин ҳамкорлик қилади: у ерга ҳар ёзда Пеп ва асосий жамоадан бир нечта ёш иқтидор эгалари келишади.
• "Нью-Йорк Сити" собиқ юлдуз футболчиларга макон ҳисобланади, Фрэнк Лэмпард, Давид Вилья, Андреа Пирло бу ерда фаолиятига якун ясаган. Энди клуб МЛС харитасида муҳим куч бўлиб қолмоқда.
• “Мельбурн Сити” Австралия чемпионатининг етакчиларидан бири саналади. “Монтевидео Сити” эса сўнгги икки йил давомида Уругвай биринчи лигасида барқарор ўйнаб келмоқда.
Энди империянинг Италияда ўз клуби бўлади. Футбол географияси шу орқали кенгайиб бормоқда.
