ЎФА ишчи гуруҳи Тошкент вилоятида қурилиш ва реконструкция ишлари олиб борилаётган Ўзбекистон миллий терма жамоалари тайёргарлик марказининг қурилиш жараёнларини ўрганди.
Марказдан ўрин олган объектлар, жумладан, машғулот майдончаси ва стадион лойиҳасининг техник-ташкилий жараёнлари кўздан кечирилди. Объектдан ўрин оладиган 2 та гибрид ва 2 та сунъий қопламали футбол майдонларини халқаро стандартлар асосида сифатли бунёд этиш, қўшимча дринаж тизимларини тўғри созлаш, келгусида чимларни сақлаш ва парваришлар учун керакли қурилмаларни ташкил этиш юзасидан топшириқ берилди.
Шунингдек, терма жамоалар футбол марказида жойлашадиган тиббий-тикланиш, ётоқхона ва ошхонани замонавий ускуналар билан жиҳозлаш юзасидан фикр алмашилди. Шаҳарчада кутубхона, ресторан ҳамда яшил ҳудуд ташкил этиш лойиҳаси ҳамда инфратузилмадан ўрин оладиган кейинги режалари муҳокама қилинди.
Бундан ташқари, қурувчи компания вакилларига барча жараёнларни жадаллаштириш, қурилиш ишларини сифатли амалга ошириш билан бир қаторда лойиҳаларнинг хавфсизлик жиҳатларига алоҳида эътибор қаратиш кераклиги айтилди ва керакли кўрсатмалар берилди.
