Куни кеча «Насаф» билан шартномага имзо чеккан Владимир Шишелов клуб матбуот хизмати вакилларига ўз фикрларини билдириб ўтди.

-“Насаф” жамоаси сафига қўшилганимдан хурсандман. Бу жамоага келишим олдинга қўйилган қадам деб биламан. Ўйлайманки, “Насаф” билан юқори чўққиларни забт этаман, -дейди футболчи.

-Сиз кўп йиллар мобайнида Россия чемпионатининг 1-дивизионида тўп сургансиз. Ўзбекистон чемпионати билан таққослаганда, қайси чемпионат кучли деб ҳисоблайсиз?
-Ҳар бир чемпионатнинг ўзига яраша қийинчиликлари ҳамда камчиликлари бор. Россияда кўпинча юқори жисмоний тайёргарликка кўпроқ эътибор қаратишади. Миллий чемпионатимизда эса жамоалар техникага асосланган футбол ўйнашади. Менимча, футболчи ўз устида меҳнат қилиб ишласа ҳар қандай чемпионат у учун осон кечиши таббий.

- “Насаф” сафида иккинчи даврани тўпурар сифатида якунлай оласизми?
- Мен бу ҳақида бирор нарса дея олмайман. Ҳар бир учрашувда тўп киритиб жамоам ғалабасига ўз ҳиссамни қўшишга ҳаракат қиламан.

- “Насаф” чемпионатимиздаги етакчи жамоалардан саналади. Бу йилги мавсумда ҳам жамоа олдига икки фронтда ҳам энг юксак мақсадлар қўйилган. Жамоа билан ушбу мақсадларни амалга ошира оласизми?
-Мен агарда бу нарсага ишонмаганимда бу ерга келмасдим. Ўз олдимизга қўйилган вазифани уддалашга ишонамиз ва ҳаракат қиламиз.

-“Насаф” мухлисларига нималарни ваъда қила оласиз?
- Мен “аждарлар” ишқибозларига бир нарсани ваъда қила оламан. Ҳар бир учрашувда бор кучим билан ҳаракат қилиб, жамоа ғалабаси учун ўз тажрибамни ишга соламан.