Корея терма жамоаси бош мураббийи Паулу Бенту ЖЧ-2022 1/8 финалида Бразилияга 1:4 ҳисобида мағлуб бўлганидан сўнг Корея термасидаги фаолиятини якунлаганини маълум қилди.

“Сиз фақат келажак ҳақида ўйлашингиз керак ва бу Корея терма жамоаси билан боғлиқ бўлмайди. Мен буни ҳозиргина футболчиларга ва Жанубий Корея федерацияси президентига эълон қилдим ва бу қарорни сентябрь ойида қабул қилганман. Футболчиларга қилган барча ишлари учун раҳмат айтишим керак. Улар борларини беришди ва мен уларнинг мураббийи бўлганимдан жуда хурсандман", - дея Бентунинг сўзларини келтиради Sky Sports.

53 ёшли мутахассис Корея терма жамоасини 2018 йилдан буён бошқариб келаётган эди. ЖЧ-2022 гуруҳ босқичида терма жамоа Уругвай билан дуранг ўйнади (0:0), Ганага ютқазди (2:3) ва Португалияни мағлуб этди (2:1). Корея H гуруҳида иккинчи ўринни эгаллади.