Хабарингиз бор, шу йилдан эътиборан олий лиганинг ҳар бир клуби футбол қоидалари бўйича семинардан ўтказилмоқда. Сабаби 2012/2013 йилги мавсум учун мўлжалланган футбол ўйини Қоидаларига ўзгаришлар киритилган.

“Андижон” клуби футболчилари ҳам Олий лига 14-туридан олдин бир кунлик семинарда қатнашишди. Ушбу семинарни ўтказишдан кўзланган мақсад – ўйин қоидаларини ўрганиш ва асосларини такрорлаш, шунингдек, Ўзбекистон Чемпионати ҳамда халқаро ўйинларда тез-тез учрайдиган ўйин ҳолатлари бўйича долзарб масалаларни муҳокама қилишдир.

ФИФА ва ОФКнинг энг сўнгги ўқув қўлланмаларидан фойдаланилган семинарда қуйидаги мавзулар муҳокама қилинди:

- Рақибга оёқ билан зарба бериш;
- Рақибга қўл билан зарба бериш;
- Вақтни чўзиш;
- Симуляция;
- Норозилик билдириш;
- Тўпни қўл билан ўйнаш;
- «Ўйиндан ташқари ҳолат»;
- Ўйинни қайта бошлашда вақтни чўзиш;
- Стандарт вазиятларда талаб қилинган масофани сақлаш;
- Рақибни гол уриш учун яққол имкониятдан маҳрум қилиш;
- Футболчилар экипировкаси;
- Расмий шахсларнинг техник ҳудуддаги ҳулқи.

Юқоридаги барча ҳолатларни ОФК инструктори Фарҳод Абдуллаев футболчиларимизга катта монитордаги видеолар орқали кўрсатиб тушунтириб берди. Барча вазиятлар таҳлил қилинди. Ҳолатлар кўрсатиб бўлинганидан сўнг футболчилар ўзларини қизиқтирган саволларга жавоб олишди. Деярли 1,5 соат давом этган семинарда айниқса ёш футболчиларимиз кўп нарса билиб олишди.

Семинарни ташкил этишда ёрдам бергани учун ЎФФ Ҳакамлар ва назоратчилар бошқармасига ва ОФК инструктори Фарҳод Абдуллаевга миннатдорчилик билдирамиз.