«Барселона» ҳужумчиси Ферран Торрес ва Мадриднинг «Атлетико» клуби ҳимоячиси Стефан Савич Испания чемпионатининг 16-тури доирасидаги ўйин вақтида жанжаллашгани учун икки ўйинга дисквалификация қилинди. Бу ҳақда "Marca" хабар бермоқда.

Ўйин 8 январь куни бўлиб ўтди ва «Барселона»нинг 1:0 ҳисобидаги ғалабаси билан якунланди.

Иккинчи бўлимга қўшиб берилган вақтда Торрес ва Савич ўртасида жанжал келиб чиқди. Улар майдон марказида тўп учун курашишди ва бир-бирининг устига йиқилишди. Футболчилар ўрнидан тураётган пайтда Торрес рақибининг сочидан, Савич эса томоғидан ушлаб олди. Натижада ҳакам учрашувни тўхтатди ва иккала футболчига қизил карточка кўрсатди.

Шу тариқа, Торрес «Хетафе» ва «Жирона» билан ўйинларни ўтказиб юборади, Савич эса «Алмерия» ва «Вальядолид»га қарши ўйинларда жамоасига ёрдам бера олмайди.