Немис мутахассисининг жорий клубидаги юриши тугагандек
Юрген бир вақтлар «Майнц»ни лицензиясиз бошқарган, рекордларни янгилаган, аммо муаммоларга дош бера олмаганди. У бутун фаолиятини маҳаллий «Майнц» жамоасида ўтказди. Бу жамоа ўшангача ҳеч қачон биринчи Бундеслигада бўлмаган ва Юргеннинг ўзи унинг даражасига мос эди.
2000/01 мавсум ўрталарида 30 ёшдан ошган Юргенга жамоани бошқариш таклиф қилинди. Клопп кийиниш хонасида катта обрўга эга эди ва жамоанинг тактик таркиблари ҳақида ўз қарашларига эга эди. Ўшанда «Майнц» ачинарли ҳолатда эди - қуйи лигага тушиб кетишга жуда яқин қолганди. Бироқ немис мураббийи бошчилигидаги дастлабки 7 учрашувда клуб 6 та ғалабага эришди ва пастга тушиб кетишдан қутилиб қолганди. Ўзининг биринчи тўлиқ мавсумидаёқ Юрген жамоани шакллантиришда ўзига хос тарзда ёндашди. У музокаралар давомида ҳар бир янги ўйинчининг оиласидаги психологиясини ҳам ўрганиб чиққан ва ўйинчиларнинг ўша шаҳардан уй олишларига катта ёрдам берган. Бу ҳолат кейинчалик «Боруссия»да ҳам такрорланди. Клопп одамлар билан осон алоқада бўлган ва шогирдлари билан жуда меҳрибон муносабатда қолган бўлсада, машғулотларда ниҳоятда талабчан эди. Тўхтовсиз югуриш ва чидамлилик мутахассис раҳбарлигида шуғулланган футболчиларнинг асосий фазилатларига айланди: «Стадионни тарк этаётган биргина мухлис сиз ҳақингизда: «Улар бугун бор кучларини беришмади, озгина югуришди ва жанг қилишмади» деб ўйлаётган бўлса ҳам, демак, биз ўз ишимизни муваффақиятсиз якунладик», - деганди Клопп. Ўзининг биринчи тўлиқ мавсумидаёқ Клопп «Майнц»ни Бундеслигага деярли олиб чиққанди. Бироқ бироз омад етишмаган.
Афсуски, жамоа лиганинг охирги ўйинида 82 ва 90-дақиқаларда гол ўтказиб, имкониятни бой бериб қўйди. Аммо мухлислар Германия олий дивизионига кириш учун курашга қайтиш муқаррар эканлигини тушунишди, мағлубиятдан кейин ҳам улар ўз жамоасини олқишлар билан кутиб олишди. Кейинги мавсумда тарих такрорланди, «Майнц» яна 4-ўринни эгаллади. 2004 йилда «Майнц» ниҳоят Бундеслигага чиқди, 2005 йилда эса Клопп жамоани УЕФА кубогига олиб чиқди ва бу нафақат маҳаллий аҳоли, балки бутун Германия бўйлаб шов-шувга сабаб бўлди. «Майнц»нинг бюджети жуда минимал ва клуб мураббийлар штаби таркибни янгилай олмасди. Клубда ёш цикли якунланаётган эди ва 2006/07 йилги мавсум охирида жамоа Бундеслигадан қуйи лигага тушиб кетди. Клопп ўз лавозимида қолди, аммо «Майнц»ни юқори лигага қайтара олмаганидан сўнг, истеъфога чиқишга қарор қилди. «Боруссия» билан у деярли ҳамма нарсага эришди, аммо еттинчи мавсумида клубни тарк этди. Юрген Клопп бошчилигида деярли минимал сармоя билан «Боруссия Дортмунд» кўп ютуқларга эришди. Тўғри ўша пайтда жамоа «Бавария» ёки Европанинг бошқа йирик клублари билан молиявий жиҳатдан рақобатлаша олмас эди, чунки кўплаб ўйинчилар ўшанда «арилар» лагерини тарк этганини кўрганмиз.
Футболчиларнинг кетиши ҳақида нима дейишим мумкин? «Бавария» худди Жеймс Бондга ўхшайди, агар уларга бирор нарса керак бўлса, нима қилиб бўлса ҳам сиздан уни тортиб олади. Клопп майдонда кутилмаган ўзгаришлар қилишдан тортинмайди ва бу ҳатто четдан кузатувчини ҳам қувонтиради. Юрген Дортмундда ёрқин ўйин кўрсатди, Бундеслига, Германия кубоги ва Суперкубогини қўлга киритди, Чемпионлар Лигаси финалига чиқди. Бу «Боруссия» учун энг юқори чўққига айланган мавсум эди. Бунинг ортидан клуб Гётце, Хуммельс, Левандовски, Кагава ва бошқа кўплаб етакчиларни бошқа жамоаларга қўйиб юборишга мажбур бўлди. Бу зарбаларга дош бериш қийин бўлди, айниқса, жамоада мавжуд имкониятлар кам бўлганида. Еттинчи мавсумида «Боруссия»нинг ўйини ва психологик муаммолари ўзининг авжига чиқди. «Қора-сариқлар» биринчи даврани турнир жадвалининг қуйи поғонасида якунлади, индивидуал кўрсаткичлар бўйича эса жамоа рақибларидан қолишмади, бу эса барчага бирдек кучли зарба бўлди. Дортмундликлар бу каби муаммолар гирдобидан чиқа олмади ва апрель ойида Клопп клубдан кетишини эълон қилди.
Мавсумнинг икки финал учрашуви жамоа психологиясига жиддий зарба берди. Бу майдонда кўринди, бу ҳақда футболчиларнинг ўзлари гапиришмоқда. Тиаго Алкантара шундай деди: «Шубҳасиз, ўтган мавсумдаги воқеалар жамоага таъсир қилди. Бу нафақат жисмоний шаклга, балки баъзи психологик жиҳатларга ҳам тегишли. Биз ютиш мумкин бўлган барча совринларни қўлга киритишга жуда яқин эдик. Лекин фақат яқинлашдик холос. Ўтган мавсум фаолиятимдаги энг яхшиларидан бири бўлди».
«Қизиллар» Юрген Клоппнинг олдинги клубларида бўлган муаммоларга дуч келишмоқда. Мерсисайдликлар руҳият ва тактик имкониятлар бўйича рақибларига ютқазиб қўйишмоқда, жамоа Премьер-лигадаги сўнгги 24 ўйиннинг 17 тасида биринчи бўлиб гол ўтказиб юборишди ва рақибларига тез-тез учрашувнинг дастлабки 10 дақиқасида гол уришга имкон беришяпти. Таркибнинг янгиланмагани, оғир жисмоний зўриқиш, ўтган мавсумдаги аламли мағлубиятлар ва жорий мавсумдаги муваффақиятсизликлар ниҳоят жамоани абгор ҳолатга олиб келди. Бироқ Юрген Клоппнинг шартномаси 2026 йилнинг ёзига қадар амал қилади. Немис мутахассиси ишдан бўшатилмаслиги аниқ ва бу мавсумдан кечиктирмай «Ливерпул»ни қайта қуришни режалаштирган.
