“Қалдирғочлар” август ойида ички мусобақаларда жами бешта расмий учрашув ўтказишди.

Дастлаб, 4 август санасида “Жар”да меҳмон бўлган водийнинг “Андижон” жамоаси ортга нурсиз дуранг билан қайтишга муваффақ бўлди. Орадан беш кун ўтиб, олий лига доирасида ўтган Тошкент дербисида томонлар муроса кўчасини танлашди – 1:1. Шундан сўнг, очко олиш илинжида пойтахтга ташриф буюрган Фарғонанинг “Нефтчи” аъзолари 2:1 ҳисобида мағлубиятга учратилди. Ўзбекистон кубоги ярим финали доирасида “Пахтакор”га қарши кечган ўйинда ҳам кучлар тенг келди – 1:1. Ва ниҳоят “Бунёдкор”нинг бу ойдаги сўнгги ўйини Қаршида “Насаф”га қарши ўтиб унда ҳам ғолиб номи аниқланмади – 0:0.

Эътиборлиси, “қалдирғочлар” шу кунгача ҳеч бир ойда бу қадар кўп очко йўқотишмаган эди. Ҳайриятки, “Бунёдкор”нинг кутилмаган “қоқилиш”ларидан бизни изма-из таъқиб этиб келишаётган – “Насаф”, “Пахтакор” ва “Шўртан” каби клублар фойдалана олишолмади.