Бугун Тошкент шаҳридаги Олимпия шон-шуҳрати музейида ХХХ ёзги олимпия ўйинлари совриндорларини тантанали тақдирлаш маросими бўлиб ўтди. Ўзбекистон Республикаси бош вазири ўринбосари А.Икромов Лондон-2012 қаҳрамонлари — А.Таймазов, Р.Собиров, А.Атоев ва С.Тигиевни ғалаба билан табриклади ва кейинги фаолиятларида улкан зафарлар тилади ҳамда давлатимиз раҳбари И.А.Каримов номида автомобиллар калати ва пул мукофотларини топширди.
Уч карра олимпиада чемпиони Артур Таймазов Chevrolet Malibu, бронза медаллари соҳиблари — Ришод Собиров, Аббос Атоев ва Сослан Тигиев Chevrolet Lacetti калитларини қабул қилиб олишди.
Шаклланган анъанага кўра, Ўзбекистон миллий олимпия қўмитаси ҳар бир олимпиададан Олимпия машъаласини олиб келади ва уни Олимпия шон-шуҳрат музейига топширади. У эса музей экспонатлари орасида фахрли жойлардан бирини эгаллайди. Лондондан ҳам Олимпиада машъаласи олиб келинди. Бу сафар эса машъалани музейга топшириш ҳуқуқи Артур Таймазовга берилди. Энди музейга ташриф буюрган ҳар бир меҳмон Лондон олимпиадаси машъаласини ўз кўзи билан кўриши мумкин.
