"ПСЖ" раҳбарияти бош мураббийи Кристоф Галтьени истеъфога чиқариш масаласи ҳозирча муҳокама қилинмаган.
RMC Sport нашри хабарига кўра, кетма-кет учта мағлубиятга қарамай, клуб раҳбарияти ҳали 56 ёшли мутахассис билан хайрлашиш ҳақида ўйламаяпти. Бу ҳеч бўлмаганда 8 мартгача содир бўлмайди, чунки, парижликларнинг ЕЧЛ 1/8 финалида "Бавария" билан жавоб ўйини шу кунга белгиланган.
Аввал хабар берганимиздек, Қатар амири Тамим ибн Ҳамад Ал Соний жамоани Зинедин Зидан бошқарашини орзу қилади. Бироқ клубда сентябрь ойида "Челси" томонидан ишдан бўшатилган Томас Тухелнинг қайтишини ёқлаётганлар бор.
19 февралда "ПСЖ" "Лилль" билан, 26 февралда "Марсель" билан, 5 март куни "Нант" билан ўйнайди.
