Ёзги трансфер бозорида “Селтик”дан “Суонси Сити”га ўтган Ки Сун Юнг ҳозирда жанубий Корея терма жамоаси таркибида Тошкентда бўлиб турибди. У эртага бўладиган Ўзбекистон-Жанубий Корея ўйинида етакчи роллардан бирини бажаришига умид қилинмоқда. Кореянинг “МК Спортс” нашри ундан тайёргарлик ва ўйин ҳақидаги фикрлари билан қизиқди.

“Вақт фарқи туфайли бироз толиққан бўлсам ҳам ўйин кунигача жисмоний холатимни тиклаб олишим тайин. Англия премиер-лигасига ўтишим ҳам терма жамоамизга катта ёрдам беришидан умидворман”, дея сўз бошларкан, эртанги ўйин ҳақида: “Фақат ғалаба ҳақида ўйлаяпмиз. Сафардаги қийин ўйин бўлишига қарамай, тайёргарлик жойида бўлса, осонгина 3 очкога эга бўлишимиз мумкин”, деди. “Табиийки, терма жамоамиз сафида ўтказадиган ўйинларимга алохида масъулият билан ёндошаман. Бу сафар ҳам ғалаба қозонсак, кейинги ўйинларда хотиржам тўп сура оламиз. Бундан ташқари, Ўзбекистон терма жамоаси биздан ҳадиксираб ўйнашади. Биз бир жамоа бўлиб, бирлашиб кучли ўйнасак, ғалаба ўз-ўзидан келади”, дея ишонч билан таъкидлади Ки Сун Юнг.

Эслатиб ўтамиз, Ки Сун Юнг 2008 йили 11 октябрда Кореянинг Сувон шаҳрида ўтган Корея – Ўзбекистон ўртоқлик ўйинида гол “таъмини тотиб кўрган”. Ўшанда Жанубий Корея 3:0 ҳисобида ғалаба қозонган эди. Чой Канг Хи қўл остидаги ҳозирги жамоа сафида Ки Сун Юнгдан ташқари Ли Донг Гук, Парк Чу Ёнг, Ли Кеун Хо каби футболчилар ҳам бундан аввалги ўйинларда Ўзбекистон дарвозасини ишғол этишни уддалашган. Бунга фикр билдираркан Ки Сун Юнг: “Энди менинг вазифам кўпроқ ҳимояга ёрдам беришдан иборат бўлади. Гол урсам яна ҳам яхшику-я, энг биринчи мақсадим жамоамиз гол ўтказмаслигига кўмак бериш”, дея айтиб ўтган.

Отабек Йўлдошев, Жанубий Корея, Сеул