Футбол бўйича 2006 йилги жаҳон чемпионатида Гана терма жамоаси дарвозасини қўриқлаган Ричард Кингсон Чехияга қарши гуруҳ босқичи ўйинида ўйинни сотиш учун таклиф қилинган 300 минг доллардан бош тортганини маълум қилди. Бу ҳақда ESPN хабар бермоқда. 34 ёшли Кингсоннинг сўзларига кўра, порадан бош тортишга уни хотини кўндирган.

Кингсон ўзининг бу баёнотини тарафдорлари томонидан пайғамбар сифатида кўрилувчи нигериялик руҳоний Ти Би Жошуа томонидан 1989 йил асос солинган “Барча халқлари Синагоги, Черкови” деб аталувчи сектага тегишли “Эммануел ТВ” телеканали эфирида берган.

Кингсоннинг сўзларига кўра, Чехия билан ўйин арафасида унга 300 минг доллар таклиф қилишган ва бу таклиф уни довдиратиб қўйган. Дарвозабоннинг тушунтиришича, уни тезда бойиб кетиш имконияти ўзига жалб этган, бунинг устига, Чехия термаси устидан қозонилган ғалаба учун атиги уч минг доллар мукофот пули берилиши ваъда қилинган, холос.

Бироқ Кингсоннинг хотини дарвозабонга уни пуллари учун севмаслигини айтганидан сўнг, Кингсон таклифни рад этишга қарор қилган. Ўйин Гана терма жамоасининг 2:0 ҳисобидаги ғалабаси билан якунига етган. Африкаликлар ЖЧ-2006 плей-оффига чиқишган ва 1/8 финалда Бразилия терма жамоасига имкониятни бой беришган (0:3).

Аввалроқ, Гана терма жамоаси ЖЧ-2006да келишилган ўйинда иштирок этгани гумон қилинганди, ўшанда гап Бразилия терма жамоаси билан ўйин ҳақида борганди. Бу ва мусобақанинг бошқа ўйинлари келишилганлиги тўғрисида канадалик журналист Деклан Хилл ўзининг “The Fix” китобида ёзган эди. ФИФА президенти Йозеф Блаттер Хиллнинг бу айбловларига жавобан, ЖЧ-2006да келишилган учрашувлар бўлиши мумкин эмаслигини айтганди.