Англия Премьер-лигасида чемпионлик пойгаси авж ола бошлади. Чемпионликка даъвогар бўлган "Манчестер Сити" бугун "Ливерпул"га қарши ўта мураккаб ўйинни ўтказади. Ушбу жуфтлик яқин йилларда Англия тожи учун курашиб келарди. Бу мавсумда ҳаммаси бошқача бўлди. "Шаҳарликлар"га "Ливерпуль" эмас, балки "Арсенал" қаршилик қила бошлади. Пеп Гвардиола жамоаси сўнгги 5 мавсумнинг 4 тасида чемпион бўлган. Фақатгина 2019-20 йилги мавсум Юрген Клопп тантанаси билан тугаган. Жорий йили манчестерликлар учун янги рақобатчи пайдо бўлди. Гвардиола шогирди Артета томонидан бошқарилаётган "Арсенал", эндиликда эски "Ливерпуль" ролини бажармоқда.
Тўпчилар айни дамда энг яқин таъқибчисидан 8 очко олдинда бормоқда. "Манчестер Сити" бугун вақтинчаликка бўлса ҳам орадаги фарқни қисқариши мумкин. Аммо "Арсенал" ҳам ҳадемай ўз ўйинини ўтказади. Микель Артета жамоаси бугун "Лидс"ни қабул қилади. Қуйида икки даъвогар жамоанинг келаётган 10 та ўйинини солиштиришга ҳаракат қиламиз. Бунда уларнинг ҳар иккисида турлича мақсадлар бор. Хусусан, "Арсенал" 19 йилдан бери давом этиб келаётган омадсизлигига чек қўймоқчи бўлса, "Манчестер Сити" мусобақани кетма-кет уч марта ютиб, бу натижани қайд этган "МЮ"дан кейинги клубга айланмоқчи.
"Арсенал – 69 очко (1-ўрин)
"Лидс" (уйда)
"Ливерпуль" (сафарда)
"Вест Хэм" (сафарда)
"Саутгемптон" (уйда)
"Манчестер Сити" (сафарда)
"Челси" (уйда)
"Ньюкасл" (сафарда)
"Брайтон" (уйда)
"Ноттингем" (сафарда)
"Вулверхэмптон" (уйда)
"Арсенал"нинг йўли унчалик ҳам осон эмас. Хусусан, улар топ еттилик жамоаларининг 4 таси билан қайта учрашади. Шулардан учтаси сафарда кечади. Шунингдек, тақвимдаги яна бешта жамоа турнирда қолиш учун курашмоқда. Ҳа, "Арсенал" "Лидс" билан баҳсда, балки қийналмас. Аммо келаётан "Ливерпуль" билан баҳс ўта мураккаб кечади. Негаки, "Арсенал" "Энфилд"да 2012 йилдан бери ғалаба қозона олмай келмоқда. Бу мавсумда "Манчестер Сити" ва "МЮ" ҳам у ердан мағлубият билан қайтган. "Вест Хэм" ва "Саутгемптон" билан ғалабага эришиш мумкин. Шунингдек, "Борнмут" ва "Астон Вилла"га қарши ҳам уч очкони аммаласа бўлади. Ундан кейин "Манчестер Сити" билан ўта муҳим баҳс келади. Ушбу жангда ғалаба қозониш, кучли руҳий устунлик беради. Кўп ўтмай, "Челси", "Ньюкасл" ва "Брайтон" билан синовли даврларни босиб ўтиш керак. Шундан кейинги "Ноттингем" ва "Вулверхэмптон"га қарши ўйинлар унчалик ҳам муаммо бўлмайди.
"Манчестер Сити" – 2 ўрин (61 очко)
"Ливерпуль" (уйда)
"Саутгемптон" (сафарда)
"Лестер" (уйда)
"Арсенал" (уйда)
"Фулхэм" (сафарда)
"Вест Хэм" (уйда)
"Лидс" (уйда)
"Эвертон" (сафарда)
"Челси" (уйда)
"Брайтон" (сафарда) – санаси аниқмас
"Брентфорд" (сафарда)
"Шаҳарликлар" ҳисобида "Арсенал"га нисбатан битта ортиқча ўйин мавжуд. Ўша баҳс 3 май куни "Вест Хэм"га қарши ўтади. Ҳаттоки, Эрлинг Холанд таркибда бўлмаса ҳам "Ливерпул"ни енгиш Гвардиола учун ўта муҳимдир. Шундан кейин жон сақлаш учун кураш олиб бораётган "Лестер" ва "Саутгемптон" билан ўйинлар бор. "Арсенал"га қарши баҳс эса чемпионликни ҳимоя қилишда ҳал қилувчи аҳамият касб этиши мумкин. Кейинги ўринларда мураккаб саналган "Фулхэм", "Вест Хэм" ва "Лидс" билан учрашувлар мавжуд. "Манчестер Сити"га "Эвертон" билан ўйин муаммо бўлмаслиги аниқ. "Челси" эса муаммолардан чиқиб кета олгани йўқ. "Шаҳарликлар" бу клубни жорий мавсумда жами 3 марта, умумий 7-0 ҳисобида мағлуб этди. "Брайтон"га қарши ўйин санаси аниқ бўлгач, 38-тур "Брентфорд" билан сафарда кечади...
ИСМАТОВ Ж.
