Ниҳоят, Ўзбекистон миллий терма жамоаси 12 октябрь куни БАА миллий терма жамоаси билан ўртоқлик учрашувини ўтказадиган бўлди. Бу ҳақда ЎФФ расмий веб-сайти хабар тарқатди.
Ўзбекистон терма жамоаси 16 октябрь куни Жаҳон чемпионатининг 5-турида Қатарга қарши баҳс олиб боради. БАА билан ўртоқлик учрашуви мазкур ўйин олдидан тайёргарлик вазифасини ўтайди.
БАА билан ўйин 12 октябрь куни Дубай шаҳридаги "Мактум бин Рашид ал-Мактум" стадионида ўтказилади. Ўзбекистон терма жамоаси делегацияси 10 октябрь куни БААга йўл олади ва у ерда 13 октябрга қадар шуғулланади. Шундан сўнг Қатар пойтахти Доҳа шаҳрига кўчиб ўтади.
БАА миллий терма жамоаси январь ойида бўлиб ўтадиган 21-Форс кўрфази кубоги мусобақасига тайёргарлик кўрмоқда. Терма жамоани эса бизга яхши таниш бўлган БАА олимпия терма жамоаси бош мураббийи Маҳди Али қабул қилиб олган. Ушбу мураббий БАА билан 2та ўртоқлик ўйинини ўтказишга улгурди. БААликлар 5 сентябрь куни сафар Японияга ютқазишган бўлса (0:1), орадан беш кун ўтиб Кувайтни ўз майдонида мағлуб этишди (3:0).
Эслатиб ўтамиз, олдинроқ терма жамоамизнинг Миср ва Саудия Арабистони терма жамоалари билан ўртоқлик учрашуви ўтказиши борасида хабарлар тарқалганди. Маълум бўлишича, бу келишув амалга ошмаган.
