Германия Бундеслигасининг 5-турида «Боруссия Дортмунд» «Айнтрахт»нинг меҳмони бўлди. Кеча бўлиб ўтган ўйин 3:3 ҳисобидаги жанговар дуранг билан якунланганди. Шундан сўнг боруссияликлар устози Юрген Клопп бир ўйинда 3 та тўп ўтказиб юбориш яхши натижа эмаслигини айтиб ўтди.

«Биз лигада 3 та гол ўтказиб юбордик, бу жуда ёмон статистика. Бу муаммони ҳал қилишимиз керак ва айнан шу бўйича бир қанча ишларни амалга оширишимиз керак. Бугун футболчилар ўзларини хотираларини йўқотиб қўйишгандек таассурот қолдиришди, улар фақат нотўғри нарсаларни қилишди».

«Биз рақибга эркин ўйнаш имкониятини бериб қўйдик. Энди эса бошқа ўйинларда ҳужумкорликни йўқотмаслик билан бирга ҳимояда ҳам яхши ўйнашимиз керак. Агар биз шундай қила олсак, бизга қарши ўйнаган ҳеч бир клубга осон бўлмайди», дейди Юрген Клопп.