Равшан Эрматов бошчилигидаги ҳакамлар бригадаси ёшлар ўртасидаги Осиё чемпионати гуруҳ босқичи 2-тур ўйинида ҳакамлик қилади.

6 ноябрь куни БАА мезбонлик қилаётган 2012 йилги ёшлар ўртасидаги Осиё чемпионати «С» ва «D» гуруҳида 2-тур учрашувлари бўлиб ўтади. Мусобақага таклиф этилган ўзбекистонлик ҳакамлар – бош ҳакам Равшан Эрматов ва ён қанот ҳаками Жаҳонгир Саидов тур доирасидаги Сурия ва Австралия терма жамоалари ўртасидаги ўйинни бошқариб боришади.

«D» гуруҳи иштирокчиси ҳисобланган Сурия терма жамоаси гуруҳ босқичи 1-турида Саудия Арабистони ёшларини 5:1 ҳисобида мағлубият учратган эди. Агар Австралияга қарши ўйинда суриялик ёшлар ғалаба қозонадиган бўлса, муддатидан аввал чорак финал йўлланмасини қўлга киритишади. Қайд этиш жоиз, «D» гуруҳи иштирокчилари чорак финалда мусобақанинг ярим финал ҳамда 2013 йили Туркияда бўлиб ўтадиган жаҳон чемпионати йўлланмаси учун Аҳмаджон Мусаев бошчилигидаги Ўзбекистон ёшлар терма жамоаси жой олган «С» гуруҳи вакилларига қарши баҳс олиб боришади.

Ўзбекистонликлар ҳакамлар бунгача гуруҳ босқичи 1-тур доирасидаги «В» гуруҳи Жанубий Корея ва Ироқ терма жамоалари ўртасидаги учрашувни (0:0) бошқариб боришганди. Бундан ташқари, Равшан Эрматов «А» гуруҳи 2-тур ўйинлари доирасидаги Кувайт – Япония учрашувида (0:1) тўртинчи ҳакам сифатида ишлади.