Эрон миллий терма жамоаси Ғарбий Осиё Футбол федерацияси Кубоги гуруҳ босқичи 2-турида ҳам гол ура олмади.
12 декабрь, жума куни Кувайтда давом этаётган 2012 йилги Ғарбий Осиё Футбол федерацияси Кубоги гуруҳ босқичи 2-тур ўйинлари доирасидаги навбатдаги ўйинлар бўлиб ўтди. Жумладан, «В» гуруҳида иштирок этаётган Эрон миллий терма жамоаси Баҳрайнга қарши майдонга тушиб, 0:0 ҳисобида дуранг ўйнади. Карлуш Кейруш шогирдлари бунгача, 1-тур доирасида Саудия Арабистони терма жамоасига қарши ўйинда ҳам 0:0 ҳисобида дуранг натижа қайд этишган эди.
Эрон терма жамоаси айни вақтда ҳисобида 2 очко билан «В» гуруҳида 3-ўринда бормоқда. Баҳрайн ва Саудия Арабистони терма жамоалари ҳисобида 4тадан очко бор. Гуруҳ ғолиби тўғридан-тўғри ярим финал йўлланмасини қўлга киритса, уч гуруҳ орасида энг яхши натижани кўрсатган иккинчи ўриндаги жамоа ярим финалнинг тўртинчи йўлланмаси эгасига айланади. Эрон терма жамоаси 3-турда гуруҳ аутсайдери Яманга қарши майдонга тушади.
Эслатиб ўтамиз, мусобақанинг «А» гуруҳида Ливан терма жамоаси дастлабки икки ўйиндан сўнг 3 очко жамғаргани ҳолда 3-ўринда бормоқда; ливанликлар 14 декабрь, жума куни мусобақа мезбони – Кувайт терма жамоасига қарши майдонга тушишади.
Маълумот ўрнида, Эрон ва Ливан терма жамоалари ЖЧ-2014 саралаш 4-босқичида Ўзбекистон миллий терма жамоасининг рақиблари саналади. Ўзбекистон миллий терма жамоаси «А» саралаш гуруҳи ўйинлари доирасида Эронга қарши икки ўйинда майдонга тушиб, Тошкентда 0:1 ҳисобида имкониятни бой берди ва Теҳронда 1:0 ҳисобида ғалаба қозонди. Ливанга қарши сафарда ўтказилган ўйинда Ўзбекистон миллий терма жамоаси 1:1 ҳисобида дуранг ўйнаган. Жавоб учрашуви 2013 йил 26 март куни Тошкентда ўтказилади.
ҒОФФ Кубоги-2012, гуруҳ босқичи
«В» гуруҳи, 2-тур учрашуви
12 декабрь, чоршанба
ЭРОН – БАҲРАЙН 0:0
ЭРОН: 1. Алиризо Ҳақиқий, 3. Эҳсон Ҳожисафий (17. Ёқуб Каримий, 46), 4. Шожаи Халилзода, 5. Пежман Мунтазорий, 9. Милод Нурий, 10. Меҳрдод Оладий, 11. Аҳмад Ҳасанзода (14. Поям Шарафобод, 43), 15. Умид Иброҳимий, 16. Меҳрдод Пўлатий, 18. Муҳаммадмаҳди Назарий (7. Абулқосим Деҳнавий, 77), 19. Муҳаммадризо Хонзода.
Навбатдаги ўйинлар
«А» гуруҳи, 3-тур учрашуви
14 декабрь, жума
Кувайт – Ливан
«В» гуруҳи, 3-тур учрашуви
15 декабрь, шанба
Эрон - Яман
