"Пахтакор" Осиё чемпионлар лигаси гуруҳ босқичининг 6-турида ғалаба қозонса, бироздан кейин бошланадиган "Персеполис" - "Дуҳайл" ўйини натижасини кузатишимиз керак бўларди. Аммо пахтакорчилар бизни қийнаб ўтиришмади. Муддатидан олдин кейинги босқичга чиқмаслик вазифасини "шараф" билан уддалади.

Ҳожимат Эркинов 10-дақиқада ҳисобни очганида кайфиятимиз кўтарилиб, умид пайдо бўлганди. Аммо саудияликлар Тошкентга ғалаба учун келганини намойиш этиб, "Пахтакор"нинг тажрибасиз ҳимоя чизиғи бир эмас, икки эмас, нақ 4 марта жазолади. Меҳмонлар танаффусга қадар ҳисобни тенглаштирган бўлса, улар иккинчи бўлимда "шерлар" дарвозасига 3 марта йўл топишди.

"Пахтакор" иккинчи бўлимда голга тортадиган бир нечта вазият яратди, аммо гоҳида зарбага аниқлик етишмаган бўлса, баъзида "Файҳа" посбони қаҳрамонлик кўрсатди.

Бугунги ўйинни "Пахтакор" сафида Одил Ҳамробеков дисквалификация туфайли ўтказиб юбораётган бўлса, Собирхўжаев, Азмиддинов, Банашак, Алижонов, Ҳамдамов ва Ҳамралиев жароҳат туфайли иштирок эта олишмади.

Натижада "Пахтакор" - "Ал-Файҳа" - 1:4. 9 очко жамғарган Саудия клуби энди "Персеполис" иштирокидаги ўйинни кузатади.

Осиё чемпионлар лигаси.
"ПАХТАКОР" - "Ал Файҳа" 1:4 (1:1)
Голлар: Ҳожимат Эркинов (10) - Жуниор Сакала (39, 90+3), Султон Мандаш (47), Генри Оньекуру (85)
Ҳакамлар: Аҳмад Ал Каф, Бакар Амри, Рашид Қайти (Ўмон), Монгколчай Печшри (Таиланд).
"Пахтакор": Павлюченко, Саитов, Абдумажидов, Турсунов, Сайфиев, Асқаров, Холматов, Эркинов, Турғунбоев, Черан, Холдорхонов.
"Ал-Файҳа": Аҳмад Кассар, Абдулраҳмон Сафарий, Юсуф Ҳақавий, Жуниор Сакала, Муҳаммад Бақавий, Милан Павков, Султон Мандаш, Наваф Хартий, Ҳуссайн Шувайш, Абдулраҳмон Аназий, Осама Ҳалаф.