"Paxtakor" Osiyo chempionlar ligasi guruh bosqichining 6-turida g‘alaba qozonsa, birozdan keyin boshlanadigan "Persepolis" - "Duhayl" o‘yini natijasini kuzatishimiz kerak bo‘lardi. Ammo paxtakorchilar bizni qiynab o‘tirishmadi. Muddatidan oldin keyingi bosqichga chiqmaslik vazifasini "sharaf" bilan uddaladi.

Hojimat Erkinov 10-daqiqada hisobni ochganida kayfiyatimiz ko‘tarilib, umid paydo bo‘lgandi. Ammo saudiyaliklar Toshkentga g‘alaba uchun kelganini namoyish etib, "Paxtakor"ning tajribasiz himoya chizig‘i bir emas, ikki emas, naq 4 marta jazoladi. Mehmonlar tanaffusga qadar hisobni tenglashtirgan bo‘lsa, ular ikkinchi bo‘limda "sherlar" darvozasiga 3 marta yo‘l topishdi.

"Paxtakor" ikkinchi bo‘limda golga tortadigan bir nechta vaziyat yaratdi, ammo gohida zarbaga aniqlik yetishmagan bo‘lsa, ba’zida "Fayha" posboni qahramonlik ko‘rsatdi.

Bugungi o‘yinni "Paxtakor" safida Odil Hamrobekov diskvalifikasiya tufayli o‘tkazib yuborayotgan bo‘lsa, Sobirxo‘jayev, Azmiddinov, Banashak, Alijonov, Hamdamov va Hamraliyev jarohat tufayli ishtirok eta olishmadi.

Natijada "Paxtakor" - "Al-Fayha" - 1:4. 9 ochko jamg‘argan Saudiya klubi endi "Persepolis" ishtirokidagi o‘yinni kuzatadi.

Osiyo chempionlar ligasi.
"PAXTAKOR" - "Al Fayha" 1:4 (1:1)
Gollar: Hojimat Erkinov (10) - Junior Sakala (39, 90+3), Sulton Mandash (47), Genri Onyekuru (85)
Hakamlar: Ahmad Al Kaf, Bakar Amri, Rashid Qayti (O‘mon), Mongkolchay Pechshri (Tailand).
"Paxtakor": Pavlyuchenko, Saitov, Abdumajidov, Tursunov, Sayfiyev, Asqarov, Xolmatov, Erkinov, Turg‘unboyev, Cheran, Xoldorxonov.
"Al-Fayha": Ahmad Kassar, Abdulrahmon Safariy, Yusuf Haqaviy, Junior Sakala, Muhammad Baqaviy, Milan Pavkov, Sulton Mandash, Navaf Xartiy, Hussayn Shuvaysh, Abdulrahmon Anaziy, Osama Halaf.