«Manchester Siti» Angliya Premyer-ligasidan chiqarib yuborilgan taqdirda hujumchi Erling Xoland bo‘yicha qanday yo‘l tutishini belgilab oldi.

Football Insider ma’lumotiga ko‘ra, jamoa Chempionshipga tushib ketgan taqdirda ham «shaharliklar» Xoland uchun juda katta tovon puli talab qiladi. Klub rahbariyati norvegiyalik hujumchining Angliyaning ikkinchi darajali divizionida o‘ynashini imkonsiz deb hisoblasa-da, uni arzon narxda sotish bo‘yicha hech qanday taklifni ko‘rib chiqmaydi.

Manbaga ko‘ra, Yevropaning ayrim grand klublari yuzaga kelishi mumkin bo‘lgan vaziyatdan foydalanishga tayyor. Biroq Xolandning «Manchester Siti» bilan shartnomasida jamoa quyi divizionga tushib ketgan taqdirda kelishuvni bekor qilish bandi mavjud emas. Jamoaning boshqa yetakchi futbolchilari shartnomalarida ham shunday band yo‘q.

Shu sababli «Manchester Siti» Xoland yoki boshqa yetakchilarini arzon narxda sotishni rejalashtirmayapti.

26 yoshli hujumchining klub bilan shartnomasi 2034 yilga qadar amal qiladi.