Қатар терма жамоаси билан бор-йўғи 10 ой ишлаган Карлос Кейруш куни кеча ўз лавозимини тарк этганидан хабарингиз бор.
Ушбу мураббий Эрон терма жамоаси бош мураббийи сифатида ўзбек мухлислари орасида қўрқинчли хотиралар билан эсланади. Лекин Кейруш Эронда ўтказган 8 йиллик фаолиятидан сўнг, ҳеч қайси терма жамоада узоқ ушланиб қолмади.
Эрондан кейин Колумбия терма жамоасини бошқарган португалиялик мураббий, ЖЧ-2022 саралашида Эквадордан учралган 1:6 ҳисобидаги шармандали мағлубиятдан кейин ишдан олинган эди.
Кейинчалик Муҳаммад Салаҳ етакчилигидаги Миср терма жамоаси билан ҳам ЖЧ-2022 га чиқиш вазифасини уддалай олмади. Ҳаттоки мухлисларимиз орасида унчалик хушланмайдиган Эктор Купер ҳам Мисрни 2018 йилги ЖЧга олиб чиқиш вазифасини эплаган эди.
Эрон терма жамоаси эса ЖЧ-2022 бошланишидан олдин, саралашни муваффақиятли ўтказган Драган Скочичга чиқиш эшикларини кўрсатган ҳолда, саралашда бир эмас, иккита терма жамоа билан муваффақиятсизликка учраган Кейруш билан Қатарга йўл олади. Кейин Қатарда нима бўлганини ўзингиз яхши эсласангиз керак.
Мана энди Осиёнинг амалдаги чемпиони - Қатар терма жамоси билан 11 учрашувда бор-йўғи 4 та ғалабага эришган Кейруш, араб футболчилари билан тил топиша олмасдан, ўз лавозимини тарк этишга мажбур бўлмоқда.
Карлос Кейрушнинг кучли мураббий эканлигига ҳеч қандай шубҳа йўқ. Бунинг устига, унинг ишига баҳо бериш бизга қолган эмас. Лекин ҳар бир мураббийнинг фаолиятида ўзига идеал тарзда мос тушадиган жамоаси бўлар экан. Эрон терма жамоаси - Кейруш учун яралган жамоа эди ва энди Кейруш ўзи учун бошқа "Эрон" топа олмаса керак.
